ජනාධිපතිවරයා විසින් ප්රකාශයට පත් කරන ලද මහජන හදිසි අවස්ථා තත්ත්වය තවත් මසක කාලයකින් දීර්ඝ කිරීමට රජය පියවර ගෙන තිබේ. ඊට අදාළ ගැසට් නිවේදනය ජනාධිපති ලේකම් ආචාර්ය එන්. එස්. කුමනායක මහතා විසින් ඊයේ (28) නිකුත් කර ඇත.
දිට්වා සුළි කුණාටුව හේතුවෙන් ඇති වූ ආපදා තත්ත්වය සැලකිල්ලට ගනිමින් මහජන ආරක්ෂාව, රටේ යථා පැවැත්ම සහ මහජන ජීවිතයට අත්යවශ්ය සැපයීම් හා සේවා පවත්වාගෙන යාම සඳහා මෙම පියවර ගෙන තිබේ.
ඕනෑම රාජ්ය සංස්ථාවකින්, රජයේ දෙපාර්තමේන්තුවකින්, පළාත් පාලන ආයතනයකින් හෝ සමූපාකාර සමිතියකින් සපයනු ලබන සේවාවන් අත්යවශ්ය සේවා බවට පත් කරමින් නිකුත් කර තිබූ ගැසට් නිවේදනය ද මෙහිදී දීර්ඝ කර ඇත.
විදුලි බලය සැපයීම, ඛනිජ තෙල්, ගෑස් ඇතුළු ඉන්ධන බෙදාහැරීම, සෞඛ්ය සේවාව සහ පොදු ගමනාගමන සේවා ඇතුළු ක්ෂේත්ර රැසක් අත්යවශ්ය සේවා ලෙස තවදුරටත් ක්රියාත්මක වේ.
