වත්මන් රජය මහා සංඝරත්නය ප්රමුඛ ආගමික නායකයන් ඉලක්ක කරගනිමින් දිගින් දිගටම පීඩනයක් එල්ල කරන බව විපක්ෂ නායක සජිත් ප්රේමදාස මහතා පවසයි. අද (10) විශේෂ ප්රකාශයක් සිදු කරමින් ඔහු සඳහන් කළේ ආගමික නායකයන්ට මෙලෙස හිරිහැර කිරීම අශිෂ්ට ක්රියාවක් බවත්, මේ හේතුවෙන් ආගමික නායකයන් දැඩි කණගාටුවට පත්ව ඇති බවත්ය.
ආගමික සිද්ධස්ථානයකට බුදු පිළිමයක් වැඩමවීම පවා වරදක් ලෙස සලකා මහා සංඝරත්නය අධිකරණය ඉදිරියට ගෙන යාම කිසිසේත් අනුමත කළ නොහැකි බව විපක්ෂ නායකවරයා මෙහිදී අවධාරණය කළේය. බුදු පිළිමයක් වැඩමවීම වැනි ආගමික කටයුත්තක් අධිකරණ ක්රියාවලියකට ලක් කිරීම ශිෂ්ට සම්පන්න රජයකින් බලාපොරොත්තු විය නොහැකි බව ද ඔහු පෙන්වා දුන්නේය.
රජයක සැබෑ වගකීම විය යුත්තේ පන්සල් ඇතුළු ආගමික සිද්ධස්ථාන සංවර්ධනය කර එමගින් ගුණවත් හා නැණවත් පුරවැසි පරපුරක් නිර්මාණය කිරීම මිස ආගමික නායකයන් දඩයම් කිරීම නොවන බව ද සජිත් ප්රේමදාස මහතා වැඩිදුරටත් සඳහන් කළේය.
