ශ්රී ලංකාවේ කෘෂි ක්ෂේත්රය දියුණු කිරීම සඳහා අවශ්ය සහයෝගය දීමට වියට්නාම් රජය සූදානම් බව වියට්නාම තානාපතිනි ට්රින් තී ටැම් (Trinh Thi Tam) මහත්මිය පවසා තිබේ.
කෘෂිකර්ම, පශු සම්පත්, ඉඩම් හා වාරිමාර්ග අමාත්ය කේ.ඩී. ලාල්කාන්ත මහතා සමඟ එම අමාත්යාංශයේදී පැවැති හමුවකදී තානාපතිවරිය විසින් මෙම අදහස් පළ කර තිබේ.
මෙහිදී නව ආණ්ඩුවට වියට්නාම රජයේ සුබපැතුම් එක් කිරීමට කැමති බවත් වියට්නාමය හා ශ්රී ලංකාව අතර පවතින සබඳතා තවදුරටත් ශක්තිමත් කර ගැනීමට කැමති බවත් Trinh Thi Tam මහත්මිය පැවසීය.
ශ්රී ලංකාවේ තේ නිෂ්පාදනය ආශ්රිත උපදේශන සහාය තම රටට අවශ්ය බවත් වියට්නාමය අපනයන වෙළෙඳපොළ ඉලක්ක කර ගනිමින් සිදු කරන පලතුරු නිෂ්පාදනය සඳහා යොදා ගන්නා තාක්ෂණික ක්රම පිළිබඳ උපදේශන සහාය දෙරට අතර හුවමාරු කර ගැනීමට ද එකඟතාව පළ කරන බව ද ඒ මහත්මිය එහි දී අවධාරණය කර තිබේ.
එසේම දෙරට අතර ආහාර සුරක්ෂිතතාව තහවුරු කර ගැනීම මෙන්ම පසු අස්වනු තාක්ෂණික දැනුම හුවමාරු කර ගැනීම කෙරෙහි ද මෙම සාකච්ඡාවේදී අවධානය යොමු වී තිබිණ.
ශ්රී ලාංකේය අවශ්යතාව අනුව කෘෂිකාර්මික ක්ෂේත්රය තුළ වියට්නාමය ආයෝජනය කිරීමට සූදානම් බවත් ලාංකීය අවශ්යතාව සඳහා වන භෝග සඳහා ප්රමුඛතාව දීමට ඔවුන් සූදානම් බවත් මෙහිදී තානාපතිවරිය ඇමැති ලාල්කාන්ත මහතා හමුවේ ප්රකාශ කර තිබේ.
