සමාජය තුළින් වියැකී යන සාරධර්ම සහ හරපද්ධතීන් යළි ස්ථාපිත කරමින්, ශිෂ්ටසම්පන්න රාජ්යයක් ගොඩනැඟීමට එක්ව කැපවීම අද දවසේ සියලු දෙනාට පැවරී ඇති අත්හළ නොහැකි වගකීමක් බව ජනාධිපති අනුර කුමාර දිසානායක මහතා සිය පොසොන් දින පණිවිඩය මඟින් පවසයි.
ජනාධිපතිවරයා පෙන්වා දුන් කරුණු කිහිපයක් පහත දැක්වේ:
අනුබුදු මිහිඳු හිමියන්ගේ ලංකාගමනයත් සමඟ මෙරටට ලැබුණු බුදු දහම ශ්රී ලාංකේය ජාතියේ ගමන්මඟ අර්ථසම්පන්න ලෙස වෙනස් කළේය. බුදු දහම හුදෙක් ආගමික අර්ථයෙන් ඔබ්බට ගොස් මෙරට සංස්කෘතික, සමාජීය සහ දේශපාලනික යන සෑම ක්ෂේත්රයකම දියුණු සැකැස්මක් නිර්මාණය කළ අතර ජාතියක් ලෙස නැඟී සිටීමට අවශ්ය අත්තිවාරම ද සැකසීය. වාස්තු විද්යාව, චිත්ර කලාව, වාරි කර්මාන්තය සහ ගෘහ නිර්මාණ ශිල්පය වැනි කලා නිර්මාණ තුළින් ශ්රී ලංකාව ප්රෞඪ ජාතියක් ලෙස ලෝකය හමුවේ ඔසවා තැබීමට බුදු දහම දායක විය. වත්මන් උරුමකරුවන් ලෙස අප සතු ප්රධාන වගකීම වන්නේ සමාජයෙන් වියැකී යන සාරධර්ම යළි ගෙන එමින් ශිෂ්ටසම්පන්න රාජ්යයක් ගොඩනැඟීමට කැපවීම බව ජනාධිපතිවරයා අවධාරණය කරයි. පාර්ලිමේන්තුව සහ රාජ්ය ආයතන ඇතුළු සියලු ක්ෂේත්ර තුළ ශිෂ්ටත්වය ස්ථාපිත කිරීමට දැනටමත් කටයුතු කරමින් පවතින බව ද ඔහු සඳහන් කළේය. ආචාරධාර්මික පැවැත්මක් නොමැති රටකට සැබෑ දියුණුවක් කරා ළඟා විය නොහැකි බව පෙන්වා දුන් ජනාධිපතිවරයා, මිහිඳු මහ රහතන් වහන්සේ දේශනා කළ අනුපූර්ව ශික්ෂණයේ වැදගත්කම ද සිහිපත් කළේය.
නව ආකල්ප සහිත නූතන ශිෂ්ටසම්පන්න රාජ්යයක් ගොඩනැඟීම වෙනුවෙන් තිර අදිටනින් යුතුව අත්වැල් බැඳගන්නා ලෙස ජනාධිපතිවරයා සියලු දෙනාට ආරාධනා කර ඇත.
