සමගි ජන බලවේගය සහ එක්සත් ජාතික පක්ෂය සන්ධානගත වීම සඳහා පැවැත්වෙන සාකච්ඡා අසාර්ථක වී ඇත. ඒ සමගි ජන බලවේගය විසින් ඉදිරිපත් කරනු ලැබූ ප්රධාන කොන්දේසි දෙකක් හේතුවෙන් ඉදිරියට පවත්වා ගෙන යාමට නොහැකි තත්ත්වයක් ඇති වී තිබීමෙනි.
ජනාධිපතිවරණයෙන් පසුව, පුළුල් දේශපාලන සන්ධානයක් ඇති කිරීම සඳහා සමගි ජන බලවේගය සමග සාකච්ඡා ආරම්භ කිරීමට එක්සත් ජාතික පක්ෂය විසින් නියෝජ්ය නායක රුවන් විජයවර්ධන, හිටපු මන්ත්රිනී තලතා අතුකෝරළ මහත්මිය ඇතුළු නියෝජිත පිරිසක් නම් කරනු ලැබීය.
මෙම කණ්ඩායම දැනට සජබ නියෝජිතයන් සමග එක් එක් ආකාරයෙන් සාකච්ඡා වට අටක් පමණ පවත්වා තිබෙන අතර, ඉහත සාකච්ඡාවලදී සමගි ජන බලවේගය පාර්ශ්වයෙන් ඉදිරිපත් කෙරුණු ප්රධාන කරුණු දෙකක් සාකච්ඡා කොට, ඉදිරියට ගෙන යාම අසීරු තත්ත්වයට පත් කිරීමට හේතු වී ඇත.
සමගි ජන බලවේගයේ ලකුණ වන ටෙලිෆෝනයෙන් ඉදිරි මැතිවරණවලට තරග කළ යුතු බවට ඉදිරිපත් වූ කොන්දේසිය සහ හිටපු ජනාධිපති එක්සත් ජාතික පක්ෂ නායක රනිල් වික්රමසිංහ මහතා නව සන්ධානය තුළ නොසිටිය යුතු බවට සමගි ජන බලවේගයේ පාර්ශ්වයෙන් කෙරුණු ඉල්ලීමද, සාකච්ඡා ඉදිරියට ගෙන යාම සඳහා දැඩි බාධාවක් වී ඇත.
පසුගිය ජනාධිපතිවරණයේදී ස්වාධීන අපේක්ෂක ලෙස ඉදිරිපත් වූ රනිල් වික්රමසිංහ මහතාට ලැබුණු ඡන්දවලින් බහුතරය පෞද්ගලිකවම ඔහුට ලැබුණු ඡන්ද ලෙස සැලකෙන බැවින් හිටපු ජනාධිපතිවරයා නොමැති දේශපාලන සන්ධානයකට කිසිදු ලෙසකින් එකඟ වීමට නොහැකි බව එක්සත් ජාතික පක්ෂ නියෝජිතයන්ගේ මතය වී තිබේ.
වසර දෙකක් තුළදී රටේ ආර්ථිකය ගොඩගනිමින් පරිණත දේශපාලන නායකත්වයක් පෙන්වූ රනිල් වික්රමසිංහ මහතාගේ සහාය ඉදිරි දේශපාලන කටයුතුවලදී අනිවාර්යයෙන්ම යොදාගත යුතු බව එක්සත් ජාතික පක්ෂ නියෝජිත පිරිස සජබ පාර්ශ්වයට සෘජුවම දැනුම් දී ඇත.
සමගි ජන බලවේගය ඉදිරිපත් කර ඇති තවත් කොන්දේසියක් වන්නේ නව සන්ධානයේ නායකත්වය විපක්ෂනායක සජිත් ප්රේමදාස මහතාට පිරිනැමිය යුතු බවය. එම යෝජනාවටද එක්සත් ජාතික පක්ෂ නියෝජිතයන්ගේ බලවත් විරෝධය එල්ල වී තිබේ.
ඇති වී තිබෙන වාතාවරණය අනුව, සමගි ජනබලවේගය සහ එක්සත් ජාතික පක්ෂය ඒකාබද්ධ වී නව පුළුල් දේශපාලන සන්ධානයක් ඇති කිරීමට ගෙන යන සාකච්ඡා තවදුරටත් පවත්වා ගෙන යාමට නොහැකි පසුබිමක් නිර්මාණය වී ඇති බව ද වාර්තා විය.
