ප්රදේශයම නිහඬව ගැඹුරු නින්දේ පසුවූ අලුයම් කාලයේ රත්නපුර – බලන්ගොඩ ප්රධාන මාර්ගය දෙසින් ඇසුණු මහා ශබ්දයෙන් මුළු මහත් බංගමුව හන්දියම තැතිගැන්මකට ලක්විය. කිසිවෙකුත් බලාපොරොත්තු නොවූ මොහොතක මාරයා මාර්ගය අයිනේ සැඟවී සිටියාක් මෙන්, නිමේෂයකින් සිදුවූ අවාසනාවන්ත සිදුවීමක් හේතුවෙන් මුළු ප්රදේශයම ශෝකයට පත් කරමින් තවත් එක් අහිංසක බලාපොරොත්තුවක් මහමඟ මිලින වී තිබේ.
2026 මැයි 10 වන දින අලුයම් කාලයේ බලන්ගොඩ දෙස සිට පැල්මඩුල්ල දෙසට වේගයෙන් ධාවනය වූ යතුරුපැදියක් රියදුරුට පාලනය කරගත නොහැකිව මාර්ගයෙන් ඉවතට පැන විදුලි රැහැන් කණුවක දරුණු ලෙස ගැටී ඇත. මෙම අනතුරින් බරපතල තුවාල ලැබූ 27 හැවිරිදි පැල්මඩුල්ල ප්රදේශයේම පදිංචි තරුණයා වහාම කහවත්ත රෝහලට ඇතුළත් කිරීමට පියවර ගත්තද, අවාසනාවන්ත ලෙස ඔහු ජීවිතක්ෂයට පත්වූ බව වාර්තා වේ.
තත්පරයක නොසලකා හැරීමක් හෝ පාලනය ගිලිහීමක් තරුණ ජීවිතයක් මෙලෙස අකාලයේ නිම කිරීමට හේතු වූයේ මුළු පවුලක්ම අනාථ කරමිනි. පැල්මඩුල්ල පොලිසිය මේ පිළිබඳව වැඩිදුර විමර්ශන පවත්වන අතර, මෙම සිදුවීම අපට පසක් කර දෙන්නේ මහා මාර්ගයේ පවතින අනාරක්ෂිත බව සහ තත්පරයක වේගය ජීවිත කාලයටම කඳුළක් විය හැකි බවයි. නිවසින් පිටව යන ඔබ සුරක්ෂිතව නැවත එනතුරු මඟබලා සිටින දෑස් ගැන මොහොතක් සිතන්න.
