ඇමෙරිකා එක්සත් ජනපදය සහ ඉරානය අතර පවතින දැඩි යුදමය වාතාවරණය හමුවේ, දෙපාර්ශ්වය අතර පණිවිඩ හුවමාරු කරගන්නා ප්රධාන මධ්යස්ථකරුවෙකු ලෙස කටයුතු කිරීමට පාකිස්ථානය ඉදිරිපත්ව සිටී. අසල්වැසි රටවල් දෙකක් වන ඇෆ්ගනිස්ථානය සහ ඉන්දියාව සමඟ දේශසීමා ආතතීන් පවතින පසුබිමක, පාකිස්ථානය මෙලෙස කලාපීය සාමය වෙනුවෙන් පෙනී සිටීම බොහෝ දෙනෙකුගේ පුදුමයට හේතුවී ඇතත් ඒ පිටුපස පැහැදිලි රාජ්යතාන්ත්රික සහ ආර්ථිකමය හේතු සාධක පවතී.
පාකිස්ථාන හමුදා ප්රධානියා වන ෆීල්ඩ් මාර්ෂල් අසීම් මුනීර් සහ අමෙරිකානු ජනාධිපති ඩොනල්ඩ් ට්රම්ප් අතර පවතින සමීප සබඳතාවය මෙයට ප්රධානතම හේතුවක් වී තිබේ. ට්රම්ප් ජනාධිපතිවරයා මීට පෙර අවස්ථාවලදී පවා ප්රකාශ කර ඇත්තේ මුනීර් යනු තමාගේ ‘ප්රියතම’ ෆීල්ඩ් මාර්ෂල්වරයා බවත්, ඔහු ඉරානය ගැන බොහෝ දෙනෙකුට වඩා හොඳින් දන්නා බවත්ය. මීට අමතරව පාකිස්ථානය සතුව කිසිදු අමෙරිකානු ගුවන් කඳවුරක් නොමැති වීමත්, අනෙකුත් ගල්ෆ් කලාපීය රටවල් මෙන් පාකිස්ථානය මේ දක්වා සෘජුවම යුද්ධයට මැදිහත් වී නොමැති වීමත් නිසා විශ්වාසවන්ත සාම සාධකයෙකු ලෙස කටයුතු කිරීමට ඔවුන්ට අවස්ථාව ලැබී ඇත.
පාකිස්ථානය සිය ඉන්ධන අවශ්යතාවයෙන් වැඩි ප්රමාණයක් ආනයනය කරන්නේ හෝමූස් සමුද්ර සන්ධිය හරහා බැවින් යුද්ධය දිග්ගැස්සීම ඔවුන්ගේ ආර්ථිකයට දැඩි බලපෑමක් එල්ල කරයි. මාර්තු මස මුලදී පාකිස්ථාන රජය විසින් පෙට්රල් සහ ඩීසල් ලීටරයක මිල රුපියල් 55කින් (ආසන්න වශයෙන් සියයට 20ක වැඩිවීමක්) ඉහළ දැමූ අතර, ඉන්පසු ලෝක වෙළෙඳපොළේ තෙල් මිල තවදුරටත් ඉහළ ගියද ජනතාවට සහන සැලසීම සඳහා රජය එම පාඩුව දරා ගනිමින් මිල ස්ථාවරව තබා ගැනීමට පියවර ගෙන ඇත. එසේම ඉන්ධන පිරිමසා ගැනීම සඳහා රජයේ සේවකයින්ට සතියකට දින 4ක වැඩ මුර ක්රමයක් හඳුන්වා දීමට ද පාකිස්ථාන රජය කටයුතු කර තිබුණි.
යුද්ධය තවදුරටත් පැවතුණහොත් පාකිස්ථානයේ උද්ධමනය සහ ආර්ථික පීඩනය දරාගත නොහැකි මට්ටමකට පත්වනු ඇති බව ආර්ථික විශ්ලේෂකයෝ පෙන්වා දෙති. එබැවින් මෙම ගැටුම සමනය කිරීම පාකිස්ථානයේම පැවැත්ම සඳහා අත්යවශ්ය කරුණක් වී ඇත.
