ඇමරිකානු ජනාධිපති ඩොනල්ඩ් ට්රම්ප් ඉරානයට එරෙහි යුද මෙහෙයුම් අවසන් කිරීමට සූදානම් බවට පළවන වාර්තා හේතුවෙන් අද (31) ආසියානු වෙළඳපොළේ බොරතෙල් මිල ගණන් කැපී පෙනෙන ලෙස පහළ ගොස් තිබේ. හෝමුස් සමුද්ර සන්ධිය යළි විවෘත කිරීම පසුවට කල් තබා වුවද මෙම යුද්ධය නතර කිරීමට ට්රම්ප් කැමැත්ත පළ කර ඇති බව වෝල් ස්ට්රීට් ජර්නල් පුවත්පත වාර්තා කරයි. මෙම සුබවාදී පෙරනිමිත්තත් සමඟ බ්රෙන්ට් බොරතෙල් මිල 1%කට වඩා වැඩි ප්රමාණයකින් පහළ බැස බැරලයක මිල ඩොලර් 111.56ක් දක්වා අඩු විය.
කෙසේ වෙතත් ආර්ථික විශ්ලේෂකයන් පෙන්වා දෙන්නේ හෝමුස් සමුද්ර සන්ධිය හරහා තෙල් ප්රවාහනය සම්පූර්ණයෙන් යථා තත්ත්වයට පත්වන තෙක් තෙල් මිලෙහි ස්ථාවර අඩුවීමක් බලාපොරොත්තු විය නොහැකි බවයි. මේ අතරතුර ඩුබායි වරායේ නවතා තිබූ කුවේට් රාජ්යයට අයත් තෙල් නැවකට ඉරානයෙන් ප්රහාර එල්ල වූ බවට ද තොරතුරු වාර්තා වන අතර එමඟින් කලාපයේ තෙල් කාන්දුවීමේ අවදානමක් ද මතු වී තිබේ. ඉකුත් සෙනසුරාදා යේමනයේ හූති සටන්කාමීන් ද ඊශ්රායලයට මිසයිල ප්රහාර එල්ල කිරීම නිසා රතු මුහුද ආශ්රිත නාවික ගමන් මාර්ගවලට තවදුරටත් තර්ජන එල්ල වෙමින් පවතී.
ලෝක තෙල් සැපයුමෙන් පහෙන් එකක් පමණ ප්රවාහනය කරන හෝමුස් සමුද්ර සන්ධිය වසා දැමීම හේතුවෙන් මේ මාසය තුළ පමණක් තෙල් මිල 59%ක වාර්තාගත අගයකින් ඉහළ ගොස් තිබුණි. යුද්ධය පිළිබඳව ලැබෙන පරස්පර විරෝධී පුවත් හේතුවෙන් ඉදිරි දින කිහිපය තුළ ලෝක වෙළඳපොළේ තෙල් මිල දැඩි ලෙස උච්චාවචනය විය හැකි බව වෙළඳපොළ විචාරකයෝ වැඩිදුරටත් අනතුරු අඟවති.
