මුළු ලෝකයේම අවධානය ඉරානයේ හටගෙන ඇති යුදමය තත්ත්වය දෙසට යොමුව පවතින මෙම තීරණාත්මක මොහොතේ රුසියානු ජනාධිපති ව්ලැඩිමීර් පුටින් යුක්රේනයට එරෙහි යුද්ධය තවදුරටත් දැඩි කරමින් සිටී. පසුගිය සතියේදී යුක්රේනය ඉලක්ක කර ගනිමින් රුසියාව විසින් එල්ල කරන ලද ඩ්රෝන ප්රහාර මාලාව යුද්ධය ආරම්භ වූ දා සිට එල්ල වූ දරුණුතම ප්රහාරය ලෙස වාර්තා වේ. ලෝකයේ අවධානය වෙනතකට යොමුව ඇති අවස්ථාවෙන් ප්රයෝජන ගෙන රුසියාව මෙලෙස යුක්රේනය ආක්රමණය කිරීමේ මෙහෙයුම් වේගවත් කර ඇති බව විදෙස් විචාරකයෝ පෙන්වා දෙති.
ඉරාන යුද්ධය හේතුවෙන් ලෝක වෙළඳපොළේ බොරතෙල් මිල සීඝ්රයෙන් ඉහළ යාම රුසියානු ආර්ථිකයට විශාල වාසියක් වී තිබේ. එමෙන්ම ට්රම්ප් පාලනය විසින් රුසියානු තෙල් මත පනවා තිබූ සම්බාධක ලිහිල් කිරීම ද පුටින්ගේ ශක්තිය තවදුරටත් වැඩි කිරීමට හේතු වී ඇත. කෙසේ වෙතත් රුසියාවේ සමීපතම මිතුරන් වන ටෙහෙරානය, වෙනිසියුලාව සහ කියුබාව වැනි රටවල පවතින අභ්යන්තර අර්බුද හමුවේ රුසියාවට යම් පසුබෑමක් ද එල්ල වෙමින් පවතින බව දේශපාලන විශ්ලේෂක මාර්ක් ගැලියෝටි පවසයි.
යුක්රේන බලධාරීන් පවසන්නේ ලෝකය ඉරාන යුද්ධය දෙස බලා සිටින අතරතුර රුසියාව තමන්ට එරෙහිව සිදුකරන මෙම ම්ලේච්ඡ ප්රහාර පිළිබඳව ජාත්යන්තරය වහාම අවධානය යොමු කළ යුතු බවයි. පවතින තත්ත්වය හමුවේ ඉදිරි මාස කිහිපය යුක්රේන යුද්ධයේ මෙන්ම ගෝලීය දේශපාලනයේ ද තීරණාත්මක හැරවුම් ලක්ෂයක් වනු ඇතැයි අපේක්ෂා කෙරේ.
