ත්රස්තවාදී ක්රියාවල නිරත වන බවට වරදකරුවන් වන පලස්තීනුවන්ට මරණ දඬුවම ලබා දීමට ඉඩ සැලසෙන පරිදි ඊශ්රායල පාර්ලිමේන්තුව (Knesset) සම්මත කරගත් නව නීතිය වහාම අහෝසි කරන ලෙස යුරෝපා සංගමය ඊශ්රායලයෙන් ඉල්ලා සිටීමට සූදානම් වේ. යුරෝපා සංගමයේ විදේශ ප්රතිපත්ති ප්රධානී කාජා කලාස් (Kaja Kallas) විසින් සකස් කරන ලද නිල ප්රකාශයක කෙටුම්පතක් උපුටා දක්වමින් ‘Euronews’ වාර්තා කරන්නේ, මෙම පියවර ඊශ්රායලය ජාත්යන්තර නීතිය හමුවේ ලබා දී ඇති පොරොන්දු දැඩි ලෙස උල්ලංඝනය කිරීමක් බවයි.
ඊයේ (30) දින සම්මත වූ මෙම පනත මඟින් ත්රස්තවාදී ක්රියාවල නිරත වන්නන් හෝ ඊශ්රායල රාජ්යයේ පැවැත්ම ප්රතික්ෂේප කරන්නන් සඳහා මරණ දඬුවම නියම කිරීමට අධිකරණයට බලය ලැබේ. අග්රාමාත්ය බෙන්ජමින් නෙතන්යාහු ඇතුළු මන්ත්රීවරුන් 62 දෙනෙකු මෙයට පක්ෂව ඡන්දය ලබා දුන් අතර 48 දෙනෙකු විරුද්ධ විය. ජාතික ආරක්ෂක අමාත්ය ඉටමර් බෙන්-ග්වීර් (Itamar Ben-Gvir) මෙම නීතිය ගෙන ඒමට මූලිකත්වය ගෙන කටයුතු කළේය.
මෙම නීතිය ප්රධාන වශයෙන්ම පලස්තීනුවන්ට එරෙහිව පමණක් ක්රියාත්මක විය හැකි පක්ෂග්රාහී එකක් බවට නීති විශාරදයින් අනතුරු අඟවන අතර, යුරෝපා සංගමය ද පෙන්වා දෙන්නේ මෙය මානව හිමිකම්වලට එල්ල වූ බරපතල තර්ජනයක් බවයි. ඊශ්රායලය 1962 වසරෙන් පසු මෙතෙක් මරණ දඬුවම ක්රියාත්මක කර නොමැති අතර, මෙම නව නීතිය මඟින් එම සම්ප්රදාය බිඳ වැටෙනු ඇත. මරණ දඬුවම මඟින් අපරාධ වැළැක්විය නොහැකි බවත්, අධිකරණ දෝෂයක් සිදු වුවහොත් එය නිවැරදි කළ නොහැකි බවත් පවසමින් යුරෝපා සංගමය මෙම නීතියට සිය දැඩි විරෝධය පළ කර තිබේ.
