මෙරට ගොවීන්ගෙන් රජය විසින් මේ වන විට වී මෙට්රික් ටොන් 61,000කට අධික ප්රමාණයක් සාර්ථකව මිලදී ගෙන ඇති බව කැබිනට් ප්රකාශක අමාත්ය වෛද්ය නලින්ද ජයතිස්ස මහතා නිල වශයෙන් අනාවරණය කර තිබේ. අමාත්ය මණ්ඩල තීරණ දැනුම්දීමේ මාධ්ය හමුවේදී අදහස් දක්වමින් අමාත්යවරයා පැවසුවේ රජය විසින් මේ වන විට මිලදී ගෙන ඇති නිවැරදිම වී ප්රමාණය මෙට්රික් ටොන් 61,449ක් වන අතර එහි සම්පූර්ණ මූල්ය වටිනාකම රුපියල් මිලියන 7,383ක් වන බවයි. මෙම රජයේ වී මිලදී ගැනීමේ ක්රියාවලිය යටතේ නාඩු සුදු වී මෙට්රික් ටොන් 17,690ක් සහ නාඩු රතු වී මෙට්රික් ටොන් 43,836ක් ඇතුළුව සම්බා සුදු කිලෝ 160,000ක් ද, සම්බා රතු කිලෝ 756,000ක් ද මෙන්ම කීරි සම්බා කිලෝ 6,276ක් ද වශයෙන් විවිධ සහල් ප්රභේදයන්ට අදාළ වන පරිදි රජය විසින් මිලදී ගැනීම් සිදු කර ඇත. එමෙන්ම වත්මන් කෘෂිකාර්මික කටයුතු සඳහා පොහොර නිකුත් කිරීමේදී මේ වන විට රජයේ පොහොර සමාගම්වලට අමතරව පෞද්ගලික පොහොර සමාගම් 18ක් ද සෘජුවම දායක වී ඇති බවත්, එම සියලු සමාගම් ගොවිජන සේවා දෙපාර්තමේන්තුව හරහා සම්බන්ධීකරණය කරමින් ගොවීන් විසින් වගා කරන නිශ්චිත ඉඩම් ප්රමාණයන් සැලකිල්ලට ගෙන ක්රමවත්ව පොහොර නිකුත් කිරීමට පියවර ගෙන ඇති බවත් අමාත්යවරයා මෙහිදී වැඩිදුරටත් අවධාරණය කළේය.
