දකුණු කොරියාවේ රැකියා ලබා දෙන බව පවසා තරුණ තරුණියන්ගෙන් මුදල් වංචා කළ පුද්ගලයෙකු ශ්රී ලංකා විදේශ සේවා නියුක්ති කාර්යාංශයේ (SLBFE) විශේෂ විමර්ශන අංශයේ නිලධාරීන් විසින් අත්අඩංගුවට ගෙන තිබේ. ලයන්ස් සමාජ ජාත්යන්තරය (Lions Club International) සහ විදේශ සේවා නියුක්ති කාර්යාංශය එක්ව දකුණු කොරියාවේ රැකියා ලබා දීමේ වැඩසටහනක් සංවිධානය කර ඇති බව පවසමින්, ඒ සඳහා තමන්ගේ ප්රදේශවල තරුණයන් සම්බන්ධ කරන ලෙස ඉල්ලමින් මොහු විසින් පාර්ලිමේන්තු මන්ත්රීවරුන් වෙත පවා ලිපි යවා ඇති බව මෙහිදී අනාවරණය විය.
විදේශ සේවා නියුක්ති කාර්යාංශයේ සභාපති කෝසල වික්රමසිංහ මහතාට ලැබුණු තොරතුරකට අනුව උපාය දූතයන් යොදවා කළ දීර්ඝ විමර්ශනයකින් පසු, මාතර රාහුල හන්දිය අසල උසස් අධ්යාපන ආයතනයක පැවති දැනුවත් කිරීමේ සම්මන්ත්රණයකදී මෙම සැකකරු අත්අඩංගුවට ගෙන ඇත. එහිදී භාෂා පුහුණුව ලබන සිසුන් සඳහා රුපියල් 20,000ක ලියාපදිංචි ගාස්තුවක් අය කරමින් රජයේ අනුග්රහය ඇතිව දකුණු කොරියාවේ රැකියා ලබා දෙන බවටත්, ලියාපදිංචි වන අයට ලයන්ස් සමාජයෙන් රුපියල් 35,000ක වවුචරයක් ලැබෙන බවටත් පවසා ඇතත් එවැනි කිසිදු සම්බන්ධයක් නොමැති බව ලයන්ස් සමාජය තහවුරු කර තිබේ. අත්අඩංගුවට ගත් සැකකරු ගාල්ල ප්රදේශයේ පදිංචි 49 හැවිරිදි මාධ්යවේදියෙකු ලෙස පෙනී සිටි අයෙකු වන අතර මීට පෙර ජපාන රැකියා ජාවාරමකටද සම්බන්ධ වූවෙකි.
විදේශ සේවා නියුක්ති කාර්යාංශය අවධාරණය කරන්නේ දකුණු කොරියානු රැකියා වැඩසටහන ක්රියාත්මක වන්නේ රජයන් දෙකක් අතර (G2G) පවතින සෘජු එකඟතාවක් මත පමණක් බවත්, ඒ සඳහා කිසිදු බාහිර ආයතනයක් සම්බන්ධ කර නොගන්නා බවත්ය. එබැවින් මෙවැනි වංචනිකයන්ට හසුවී මුදල් හෝ පෞද්ගලික තොරතුරු ලබා නොදෙන ලෙස කාර්යාංශය මහජනතාවගෙන් ඉල්ලා සිටියි. සැකකරු මාතර මහේස්ත්රාත් අධිකරණයට ඉදිරිපත් කිරීමෙන් පසු අප්රේල් 7 වැනිදා දක්වා රක්ෂිත බන්ධනාගාරගත කර ඇත.
