බ්රසීලයේ මිලියන 50කට අධික ජනතාවකට නොමිලේ පිසින ගෑස් ලබාදීම සඳහා ක්රියාත්මක “ජනතාවගේ ගෑස්” (People’s Gas) වැඩපිළිවෙළ, ලෝක වෙළඳපොළේ බලශක්ති මිල ශීඝ්රයෙන් ඉහළ යාම හේතුවෙන් බරපතළ අභියෝගයකට ලක්ව ඇති බව ඉන්ධන බෙදාහරින්නන් සහ විශ්ලේෂකයෝ අනතුරු අඟවති. ලබන ඔක්තෝබර් මාසයේ පැවැත්වීමට නියමිත ජනාධිපතිවරණය ඉලක්ක කරගනිමින් වත්මන් ජනාධිපති ලුයිස් ඉනාසියෝ ලූලා ද සිල්වා විසින් පසුගිය නොවැම්බර් මාසයේදී මෙම සහන වැඩපිළිවෙළ හඳුන්වා දෙන ලදී.
ඇමෙරිකාව සහ ඊශ්රායලය ඉරානය සමඟ පවතින යුදමය වාතාවරණය හේතුවෙන් ද්රවිකෘත පෙට්රෝලියම් ගෑස් (LPG) මිල ගෝලීය වශයෙන් ඉහළ ගොස් ඇති අතර, එහි බලපෑම අවම කිරීම සඳහා බ්රසීල රජය රියල් මිලියන 330ක නව සහනාධාරයක් ප්රකාශයට පත් කර තිබේ. කෙසේ වෙතත්, මෙම වැඩපිළිවෙළ යටතේ පවතින මිල සීමාවන් හේතුවෙන් තමන්ට පාඩු සිදුවන බව පවසමින් ගෑස් අලෙවිකරුවන් එම සහන වැඩපිළිවෙළින් ඉවත් වීමේ අවදානමක් මතුව ඇත.
මෙම වසර සඳහා එම සහන වැඩපිළිවෙළ වෙනුවෙන් රියල් බිලියන 4.7ක (ඇමෙරිකානු ඩොලර් මිලියන 914කට අධික) මුදලක් වෙන් කර ඇති බව රජය පවසයි. එහෙත් යුදමය වාතාවරණය හමුවේ පිරිවැය ඉහළ යාම සහ ලාභාංශ අඩු වීම හේතුවෙන් සහන මිලට ගෑස් සැපයීම අඛණ්ඩව පවත්වාගෙන යාම දුෂ්කර වී ඇති බව ගෑස් අලෙවිකරුවන්ගේ සංගමය පෙන්වා දෙයි. මෙය ඉදිරි මැතිවරණ සමයේදී එරට දේශපාලන ක්ෂේත්රය තුළ දැඩි කතාබහට ලක්වන කරුණක් වනු ඇතැයි අපේක්ෂා කෙරේ.
