IPL ක්රිකට් ඉතිහාසයේ නව පෙරළියක් ඇති කරමින්, 15 හැවිරිදි නවක පිතිකරු වෛභව් සූර්යවංශි (Vaibhav Sooryavanshi) ලොව අංක එකේ වේග පන්දු යවන්නෙකු වන ජස්ප්රිට් බුම්රාට එරෙහිව පෑ අසාමාන්ය දක්ෂතාවය පිළිබඳව ක්රීඩා ලෝකයේ දැඩි අවධානයක් යොමු වී තිබේ. රාජස්ථාන් රෝයල්ස් කණ්ඩායම නියෝජනය කරන මෙම නව යොවුන් ක්රීඩකයා, මුම්බායි ඉන්ඩියන්ස් කණ්ඩායමට එරෙහිව පැවති තරඟයේදී පන්දු 14කදී ලකුණු 39ක් රැස් කිරීමට සමත් විය.
වර්ෂාව හේතුවෙන් පන්දු වාර 11කට සීමා වූ මෙම තරඟයේදී, සූර්යවංශි සහ යෂස්වි ජයිස්වාල් අතර පළමු පන්දු වාර 5 තුළදී ලකුණු 80ක දැවැන්ත සබඳතාවයක් ගොඩනැගුණි. එහිදී විශේෂිතම සිදුවීම වූයේ සූර්යවංශි විසින් බුම්රාගේ පන්දු හමුවේ එල්ල කරන ලද දැවැන්ත හයේ පහරවල් දෙකයි. පළමු පන්දුවටම ‘ලෝන්ග් ඔන්’ කලාපයට ඉහළින් හයේ පහරක් එල්ල කළ අතර, ඉන් පසුව තවත් ‘පුල්’ පහරක් හරහා හයේ පහරක් වාර්තා කළේ බුම්රාගේ මුවඟට සිනහවක් එක් කරමිනි.
සූර්යවංශිගේ මෙම “භීතියෙන් තොර” (Fearless) පිතිකරණය පිළිබඳව අදහස් දක්වමින් මුම්බායි නායක හර්දික් පාණ්ඩ්ය කියා සිටියේ, ලොව දක්ෂතම පන්දු යවන්නෙකුට එරෙහිව මෙවැනි කුඩා දරුවෙකු ක්රීඩා කරන ආකාරය දැකීම විස්මිත සහ ආකර්ශනීය බවයි. ට්රෙන්ට් බෝල්ට් සහ ශර්දුල් තාකූර් වැනි ප්රබල පන්දු යවන්නන්ට ද නොබියව මුහුණ දුන් සූර්යවංශිගේ ඉනිම අවසන් වූයේ තිලක් වර්මා විසින් රැකගත් විශිෂ්ට උඩපන්දුවක් හේතුවෙනි. මෙම තරඟයෙන් රාජස්ථාන් රෝයල්ස් කණ්ඩායම ලකුණු 27ක ජයක් වාර්තා කිරීමට සමත් විය.
