පෙබරවාරි 28 වැනිදා ආරම්භ වූ ඉරාන – ඇමෙරිකානු යුද්ධය නිමා කිරීම සඳහා වන තීරණාත්මක සාම සාකච්ඡා සත්කාරකත්වය සඳහා පකිස්ථානය මේ වන විට සියලු කටයුතු සූදානම් කර තිබේ. දැනට ක්රියාත්මක වන සති දෙකක සටන් විරාම කාලසීමාව තුළ පැවැත්වෙන මෙම සාකච්ඡා සඳහා පහසුකම් සැලසීමට පකිස්ථාන රජය ඉස්ලාමාබාද් අගනුවරට විශේෂ ආරක්ෂාවක් යොදවා ඇති අතර, බ්රහස්පතින්දා සහ සිකුරාදා (අප්රේල් 10) දින දෙක රජයේ නිවාඩු දින ලෙස ද ප්රකාශයට පත් කර ඇත.
පකිස්ථාන විදේශ අමාත්ය ඉෂාක් ඩාර් (Isaq Dar) අද නිවේදනය කළේ මෙම සාකච්ඡා සඳහා සහභාගී වන සියලුම නියෝජිතයින් සහ විදේශීය මාධ්යවේදීන් සඳහා පකිස්ථානයට පැමිණීමේදී ලබා දෙන වීසා (Visa-on-arrival) පහසුකම ලබා දෙන බවයි. සාකච්ඡා පවත්වන නිශ්චිත ස්ථානය හෝ වේලාව ආරක්ෂක හේතූන් මත මෙතෙක් නිල වශයෙන් ප්රකාශයට පත් කර නැති වුවද, ඉස්ලාමාබාද්හි අධි ආරක්ෂිත කලාපයේ (Red Zone) පිහිටි ප්රමුඛ පෙළේ හෝටල්වල සිටි අමුත්තන්ට ඉවත් වන ලෙස ද දැනුම් දී තිබේ.
ෂෙබාස් ෂරීෆ්ගේ රජය මෙම සාකච්ඡා සඳහා මධ්යස්ථ පාර්ශවයක් ලෙස කටයුතු කරන අතර, ඉරාන සහ ඇමෙරිකානු දූත පිරිස් වෙනම කාමරවල සිටිමින් පකිස්ථාන නිලධාරීන් හරහා යෝජනා හුවමාරු කර ගන්නා “වක්ර සාකච්ඡා” (Indirect talks) ක්රමවේදයක් මෙහිදී අනුගමනය කරනු ඇතැයි අපේක්ෂා කෙරේ. ජනාධිපති ට්රම්ප් සහ ඉරාන නායකත්වය අතර පවතින මෙම ගැටුමට ස්ථිර විසඳුමක් සෙවීම සඳහා ලෝක අවධානය හෙට (සෙනසුරාදා) ආරම්භ වීමට නියමිත පළමු වටයේ සාකච්ඡා දෙසට යොමු වී පවතී.
