ළමයින් ඉලක්ක කරගනිමින් ඉන්ස්ටග්රෑම් (Instagram) සමාජ මාධ්ය ජාලය ඇබ්බැහි කරවන ආකාරයෙන් නිර්මාණය කළ බවට මෙටා (Meta) සමාගමට එරෙහිව මැසචුසෙට්ස් ප්රාන්තය පවරන ලද නඩුව විභාග කිරීමට එරෙහිව එම සමාගම ඉදිරිපත් කළ අභියාචනය එරෙහි ඉහළ අධිකරණය ප්රතික්ෂේප කර තිබේ. මැසචුසෙට්ස් ශ්රේෂ්ඨාධිකරණය සිකුරාදා ලබා දුන් මෙම තීන්දුවත් සමඟ මෙටා සමාගමට එරෙහි නීතිමය ක්රියාමාර්ග ඉදිරියට ගෙන යාමට ප්රාන්ත නීතිපතිවරියට අවස්ථාව හිමි වේ. මෙටා සමාගම හිතාමතාම තරුණ පරිශීලකයන් ඇබ්බැහි කරවන ක්රමවේද අනුගමනය කළ බවට එල්ල වී ඇති චෝදනා හමුවේ ෆෙඩරල් නීති මඟින් සමාගමට ලැබෙන ආරක්ෂාව මෙහිදී වලංගු නොවන බව අධිකරණය අවධාරණය කළේය.
අන්තර්ජාල සමාගම් විසින් පලකරන අන්තර්ගතයන් සම්බන්ධයෙන් ඔවුන්ට හිමිවන නීතිමය මුක්තිය (Section 230), මෙවැනි ඇබ්බැහි කරවන සුලු තාක්ෂණික සැලසුම් සම්බන්ධ චෝදනාවලදී අදාළ නොවන බව ප්රාන්ත අධිකරණයක් තීන්දු කළ පළමු අවස්ථාව මෙය ලෙස ඉතිහාසයට එක් වේ. මේ වන විට මෙටා සමාගමට එරෙහිව අමෙරිකාව පුරා ප්රාන්ත රැසක මෙවැනිම සමාජ මාධ්ය ඇබ්බැහිය පිළිබඳ නඩු ගොනු කර ඇති අතර, මෙම තීන්දුව එම සියලු නඩුවලට ප්රබල බලපෑමක් එල්ල කරනු ඇතැයි විශ්වාස කෙරේ. මැසචුසෙට්ස් නීතිපති ඇන්ඩ්රියා ජෝයි කැම්බල් ප්රකාශ කළේ දරුවන්ගේ මානසික සෞඛ්යයට වඩා සමාගමේ ලාභය ගැන සිතන මෙවැනි තාක්ෂණික දැවැන්තයන් නීතිය ඉදිරියට ගෙන ඒමට මෙම තීන්දුව මඟ පාදන බවයි.
