දිගු ගුවන් ගමනකින් පසු වෙහෙසට පත්ව හොංකොං ජාත්යන්තර ගුවන් තොටුපළට (HKIA) පැමිණෙන සංචාරකයන්ට මේ දිනවල දැකගත හැකි අපූරු දසුනක් වන්නේ එහි නිදා සිටින මීටර් අටක් දිගැති දැවැන්ත තැඹිලි පැහැති බළල් අනුරුවයි. “A Moment to Purr” (සුරතල් වීමට නිමේෂයක්) යන තේමාව යටතේ පාස්කු උත්සවයට සමගාමීව නිර්මාණය කර ඇති මෙම අන්තර්ක්රියාකාරී බළල් අනුරුව, අප්රේල් 3 සිට මැයි 2 දක්වා ගුවන් තොටුපළේ පළමු වැනි පර්යන්තයේ ආගමන ශාලාවේ (Hall A) ප්රදර්ශනය කෙරේ.
මෙය හුදෙක් අනුරුවක් පමණක් නොව, සැබෑ බළලෙකු මෙන් කන්, අත් පා සහ වලිගය සෙලවිය හැකි මෙන්ම මෘදු ගෙරවුම් හඬක් ද නිකුත් කරන සජීවී නිර්මාණයකි. නරඹන්නන්ට ඩිජිටල් තිරයක් මඟින් අතථ්යව (Virtually) මේ බළලාට කෑම කැවීමට සහ සුරතල් කිරීමට අවස්ථාව ලැබෙන අතර, ඊට ප්රතිචාර ලෙස බළලා සිය අවයව සෙලවීම කාගේත් මුවගට සිනහවක් ගෙන එන්නකි. සාම්ප්රදායික “පාස්කු හාවා” වෙනුවට බළලුන් තෝරාගැනීම හරහා හොංකොං නගරය තුළ වර්ධනය වන ‘බළල් ආර්ථිකය’ සහ සතුන් කෙරෙහි ඇති මිනිස් ලැදියාව පිළිබිඹු කිරීමට බලධාරීන් උත්සාහ කර ඇත.
ගුවන් තොටුපළට අමතරව බටහිර කව්ලූන් සහ මුයි වෝ වැනි ප්රදේශවල ද මෙවැනි බළල් නිර්මාණ ප්රදර්ශනය කරමින් මුළු හොංකොං නගරයම මේ වන විට මෙම සුරතලුන්ගේ තේමාවෙන් හැඩගැසී තිබේ. කඩිමුඩිය සහ ආතතිය පිරුණු ගුවන් ගමන් අවසානයේ මෙවැනි ආදරණීය වෙනසක් මඟින් සංචාරකයන්ගේ හදවත් දිනා ගැනීමට හොංකොං බලධාරීන් සමත්ව ඇත.
