යාපනය, වඩ්ඩුකෝට්ටේ පොලිස් බලප්රදේශයට අයත් තොල්පුරම් ප්රදේශයේදී තරුණයින් දෙපිරිසක් අතර ඇති වූ දරුණු ගැටුමකින් 27 හැවිරිදි තරුණයෙකු ජීවිතක්ෂයට පත්ව තිබේ. ඊයේ (අප්රේල් 12) රාත්රී 11ට පමණ මෙම ඛේදවාචකය සිදුව ඇති බව වාර්තා වේ. එකම ගම්මානයේ පදිංචි තරුණයින් දෙදෙනෙකු අතර වසර කිහිපයක සිට පැවති පෞද්ගලික ආරවුලක් මෙම ඝාතනයට මුල් වී ඇත.
සිද්ධිය වාර්තා වන ආකාරයට, මියගිය තරුණයා ඇතුළු පිරිසක් ප්රදේශයේ දේවාලයක ඉදිකිරීම් කටයුතුවල නිරත වෙමින් සිටියදී, තවත් තරුණයින් දෙදෙනෙකු සමඟ පැමිණි සැකකරු විසින් තියුණු ආයුධයකින් පහර දී තිබේ. පහරදීමෙන් බරපතල තුවාල ලැබූ තරුණයා එම ස්ථානයේදීම මියගොස් ඇති අතර, තුවාල ලැබූ තවත් තරුණයින් දෙදෙනෙකු මේ වන විට යාපනය ශික්ෂණ රෝහලේ ප්රතිකාර ලබමින් පසුවේ.
මෙම සිද්ධියට සම්බන්ධ එක් සැකකරුවෙකු වඩ්ඩුකෝට්ටේ පොලීසිය විසින් අත්අඩංගුවට ගෙන ඇති අතර, ඔහු අද (13) මල්ලාකම් අධිකරණයට ඉදිරිපත් කිරීමට නියමිතය. පලාගිය අනෙක් සැකකරුවන් දෙදෙනා අත්අඩංගුවට ගැනීම සඳහා පොලීසිය වැඩිදුර විමර්ශන සිදු කරයි. මියගිය තරුණයාගේ දේහය පශ්චාත් මරණ පරීක්ෂණය සඳහා යාපනය ශික්ෂණ රෝහලේ තැන්පත් කර තිබේ.
