දශක තුනකට පසු ඊශ්රායලය සහ ලෙබනනය මුහුණට මුහුණ
ඇමෙරිකානු රාජ්ය ලේකම් මාර්කෝ රුබියෝගේ මැදිහත් වීමෙන් වොෂින්ටන් නුවරදී අද (අප්රේල් 14) අතිශය තීරණාත්මක සහ ඓතිහාසික රාජ්යතාන්ත්රික හමුවක් පැවැත්විණි. 1990 දශකයේ මුල් භාගයෙන් පසු ඊශ්රායල සහ ලෙබනන තානාපතිවරුන් මෙලෙස ඉහළ මට්ටමේ සෘජු සාකච්ඡාවක නිරත වූ පළමු අවස්ථාව මෙය වන අතර, ඊශ්රායල-හෙස්බුල්ලා ගැටුම මධ්යයේ මෙම හමුව සිදුවීම විශේෂත්වයකි.
පැය දෙකක සාකච්ඡාවකින් අනතුරුව වාර්තා වූයේ, ලෙබනනය තුළ ක්රියාත්මක වන හෙස්බුල්ලා සංවිධානය “ඉරාන ආක්රමණික බලවේගයක්” ලෙස හඳුනා ගැනීමට සහ එම බලපෑමෙන් ලෙබනනය නිදහස් කර ගැනීමට දෙපාර්ශවයම ප්රතිපත්තිමය වශයෙන් එකඟ වී ඇති බවයි. ඊශ්රායල තානාපතිවරයා පවසා සිටියේ ලෙබනනය හෙස්බුල්ලා ග්රහණයෙන් මුදා ගැනීමේ අවශ්යතාවය පිළිබඳව ලෙබනන පාර්ශවය දරන මතය සමඟ තමන් ද එකඟ වන බවයි.
දැනට පවතින තත්ත්වය අනුව ලෙබනන රජය වහාම සටන් විරාමයක් අපේක්ෂා කරන අතර, ඊශ්රායලයේ මූලික කොන්දේසිය වී ඇත්තේ හෙස්බුල්ලා සංවිධානය සතු අවි ආයුධ ඉවත් කිරීමයි. කෙසේ වෙතත්, හෙස්බුල්ලා සංවිධානය මෙම සාකච්ඡා මුළුමනින්ම ප්රතික්ෂේප කර ඇති අතර ඒවා පලක් නොමැති උත්සාහයන් ලෙස හඳුන්වා දී ඇත. මෙම රාජ්යතාන්ත්රික ප්රවේශය මැදපෙරදිග දේශපාලන බල තුලනය වෙනස් කිරීමට සමත් වුවද, හෙස්බුල්ලා සංවිධානයේ දැඩි විරෝධය හමුවේ භූමියේ සැබෑ සාමයක් ඇති කිරීම තවදුරටත් අභියෝගාත්මක වී තිබේ.
තොරතුරු උපුටා ගැනීම: Mario Nawfal සහ Al Jazeera ඇසුරින්
