ශුද්ධෝත්තම 14 වැනි ලියෝ පාප්තුමා සිය අප්රිකානු සංචාරය ආරම්භ කරමින් ඇල්ජීරියාවට පැමිණ සිටී. මෙම සංචාරයේදී උන්වහන්සේ ඇල්ජියර්ස් නුවර සිට ඇන්නාබා දක්වා ගමන් කළ අතර, ශාන්ත ඔගස්ටින් මුනිඳුන් වසර 30කට අධික කාලයක් රදගුරු පදවිය දැරූ ඓතිහාසික හිපෝ (Hippo) පුරාවිද්යා භූමිය නැරඹීමට ද එක් විය. සාමයේ සංකේතයක් ලෙස එහි ඔලීව පැළයක් රෝපණය කළ පාප්තුමා, යුද්ධය සහ ප්රචණ්ඩත්වය හමුවේ දෙවියන් වහන්සේගේ හදවත කැබලිවලට කැඩී යන බවත්, උන්වහන්සේ කිසිවිටෙකත් උද්ධච්ච හෝ දුෂ්ට මිනිසුන් සමඟ නොසිටින බවත් අවධාරණය කළේය.
මුස්ලිම් බහුතරයක් වෙසෙන ඇල්ජීරියාවේ සුළුතර කිතුනු ප්රජාවට සහයෝගය පළ කිරීමක් ලෙස උන්වහන්සේ ශාන්ත ඔගස්ටින් බැසිලිකාවේදී විශේෂ දිව්ය පූජාවක් ද පැවැත්වූහ. මේ සඳහා ලොව පුරා විසිරී සිටින බැතිමතුන් විශාල පිරිසක් එක්ව සිටි අතර, ඇමෙරිකානු ජාතිකයෙකු වන 14 වැනි ලියෝ පාප්තුමාගේ මෙම සංචාරය කලාපීය සාමය උදෙසා කෙරෙන සුවිශේෂී මැදිහත්වීමක් ලෙස සැලකේ.
