හොංකොං හි තායි පෝ (Tai Po) දිස්ත්රික්කයේ පසුගිය වසරේ සිදුවූ දරුණු ගිනි අනතුරින් පීඩාවට පත් වූ වැඩිහිටි වැසියන්ට, සිය නිවෙස්වල ඉතිරිව ඇති බඩුබාහිරාදිය රැගෙන ඒම සඳහා රොබෝ පාද (Robotic Exoskeleton Legs) භාවිත කිරීමට අවස්ථාව සැලසී තිබේ. පුද්ගලයන් 168 දෙනෙකුට ජීවිත අහිමි කරමින් නොවැම්බර් මස අවසානයේදී සිදුවූ මෙම මාරාන්තික ගින්නෙන් පසු, වැසියන්ට සිය නිවෙස් වෙත යාමට අවසර ලැබෙන පළමු අවස්ථාව මෙයයි.
ගින්නෙන් දැඩි ලෙස හානි වූ මහල් නිවාස සංකීර්ණයේ විදුලි සෝපාන ක්රියා විරහිත වී ඇති බැවින්, 13 වැනි මහල වැනි ඉහළ මහල්වල පදිංචිව සිටි වැඩිහිටියන්ට පඩිපෙළ නැගීම දුෂ්කර වී ඇත. දණහිස් අමාරුව සහ හුස්ම ගැනීමේ අපහසුතා ඇති 59 හැවිරිදි ෆැනී මොක් වැනි වැසියන් මේ වන විට මෙම රොබෝ පාද ආධාරයෙන් පඩිපෙළ නැගීමට විශේෂ පුහුණුවක් ලබමින් සිටිති. මෙම තාක්ෂණික උපකරණ මඟින් ඔවුන්ගේ පාදවලට අමතර ශක්තියක් ලබා දෙන අතර වෙහෙසකින් තොරව ඉහළ මහල් වෙත ළඟා වීමට මග පාදයි.
අප්රේල් 20 සිට මැයි 4 දක්වා කාලය තුළ හිටපු පදිංචිකරුවන්ට සිය නිවෙස් වෙත යාමට අවසර ලැබෙන අතර, එක් නිවසකට බඩුබාහිරාදිය එකතු කර ගැනීමට පැය තුනක කාලයක් ලබා දී ඇත. 4,000කට අධික පිරිසක් අවතැන් වූ මෙම ගොඩනැගිලි සංකීර්ණයේ ඉතිරිව ඇති වටිනා මතකයන් සහ දේපළ රැගෙන ඒමට මෙම රොබෝ තාක්ෂණය මහඟු පිටුවහලක් වී තිබේ.
