හෝමූස් සමුද්ර සන්ධියේ (Strait of Hormuz) ආරක්ෂාව තහවුරු කිරීමේ අරමුණින් යුත් යුද මෙහෙයුමක් සඳහා ජර්මානු හමුදා දායක කරගැනීමේ නිශ්චිත යෝජනාවක් චාන්සලර් ෆ්රෙඩ්රික් මර්ස් විසින් ඉදිරිපත් කිරීමට නියමිතය. ප්රංශයේ පැරිස් නුවර පැවැත්වෙන සාකච්ඡාවකදී මෙම යෝජනාව ඉදිරිපත් කෙරෙනු ඇතැයි වාර්තා වේ.
ජර්මානු රජයේ යෝජනාවට අනුව බිම්බෝම්බ නාශක නෞකා (Minehunting boats), ආරක්ෂක නෞකාවක් (Escort ship) සහ ගුවන් නිරීක්ෂණ යානා මෙම මෙහෙයුම සඳහා යොදා ගැනීමට නියමිතය. මෙහි ප්රධාන අරමුණ වන්නේ සමුද්ර සන්ධියේ පවතින බිම්බෝම්බ ඉවත් කිරීම සහ මුහුදු ප්රදේශයේ ආරක්ෂාව පිළිබඳ සමීක්ෂණ පැවැත්වීමයි.
මෙම මෙහෙයුම ක්රියාත්මක කරනු ලබන්නේ කලාපයේ පවතින සතුරුකම් අවසන් වීමෙන් පසුව සහ ඇතැම් කොන්දේසි සපුරාලීමෙන් පසුව පමණක් බව ජර්මනිය අවධාරණය කරයි. ජර්මනිය සතුව දැනට බිම්බෝම්බ නාශක නෞකා 8ක් පවතින අතර, ඉන් කීයක් මෙම මෙහෙයුමට යොදා ගන්නේද යන්න මෙතෙක් තීරණය කර නොමැත.
මෙම මෙහෙයුම සඳහා ජිබුටි (Djibouti) හි පිහිටි ජර්මානු නාවික හමුදා මධ්යස්ථානය භාවිතා කිරීමට ද සැලසුම් කර ඇත. මීටර් 50කට වඩා දිගින් යුත් බිම්බෝම්බ නාශක නෞකාවක සාමාන්යයෙන් 42 දෙනෙකුගෙන් යුත් කාර්ය මණ්ඩලයක් සේවය කරන අතර, අවශ්ය වුවහොත් විශේෂ බිම්බෝම්බ කිමිදුම්කරුවන් (Mine divers) ද ඊට එක් කර ගැනේ.
ලෝක වෙළෙඳාමට ඉතා වැදගත් වන හෝමූස් සමුද්ර සන්ධියේ ආරක්ෂාව තහවුරු කිරීම යුරෝපයේ බලශක්ති සහ ආර්ථික ස්ථාවරත්වයට සෘජුවම බලපාන බැවින් ජර්මනිය මෙම තීරණය ගෙන ඇත.
