‘ක්ලීන් ශ්‍රී ලංකා’ (Clean Sri Lanka) වැඩසටහනේ 2026 වර්ෂය සඳහා වන ක්‍රියාකාරී සැලැස්ම සහ එහි ප්‍රගතිය සමාලෝචනය කිරීමේ විශේෂ සාකච්ඡාවක් අද (17) පෙරවරුවේ ජනාධිපති ලේකම් කාර්යාලයේදී පැවැත්විණි.
මෙම වැඩසටහන හුදෙක් රාජ්‍ය ව්‍යාපෘතියකට පමණක් සීමා නොවී, මහජනතාව සෘජුවම සම්බන්ධ කරගන්නා සහ ජනතාවට වඩාත් සමීප ව්‍යාපෘතියක් ලෙස ඉදිරියට ගෙන යා යුතු බව ජනාධිපතිවරයා මෙහිදී අවධාරණය කළේය.
2026 වර්ෂය සඳහා යෝජිත නව ව්‍යාපෘති සංවිධානය කිරීමේදී ඒවා සමාජය තුළ වඩාත් ප්‍රචලිත වන අයුරින් සැලසුම් කළ යුතු ආකාරය පිළිබඳව දීර්ඝ ලෙස සාකච්ඡා විය.
පසුගිය වසරේ ලබාගත් ප්‍රගතිය සමාලෝචනය කළ ජනාධිපතිවරයා, ඉදිරි වර්ෂය සඳහා වන ඉලක්ක කඩිනමින් සපුරා ගැනීම සඳහා අදාළ සියලුම පාර්ශ්වයන් ඒකාබද්ධව කටයුතු කිරීමේ අවශ්‍යතාව පෙන්වා දුන්නේය.
මෙම වැඩසටහන හරහා පිරිසිදු හා හරිතවත් ශ්‍රී ලංකාවක් නිර්මාණය කිරීමේ රජයේ ප්‍රතිපත්තිය ජනතාවගේ එදිනෙදා ජීවන රටාවේ අංගයක් බවට පත් කිරීම මෙහි මූලික අපේක්ෂාවයි.
