ශ්රී ලංකාව තුළ මහා පරිමාණ මත්ද්රව්ය ජාවාරම් සහ සංවිධානාත්මක අපරාධ මෙහෙයවමින් විදෙස් රටවල සැඟව සිටි ප්රබල පාතාල නායකයන් රැසක් ඩුබායි, ඉන්දියාව සහ බහරේන් යන රටවලදී ආරක්ෂක අංශ අත්අඩංගුවට ගෙන තිබේ. ඔවුන් මෙරටට ගෙන්වා ගැනීම සඳහා අපරාධ පරීක්ෂණ දෙපාර්තමේන්තුවේ (CID) විශේෂ කණ්ඩායම් දැනටමත් එම රටවල් බලා පිටත්ව ගොස් ඇති බව වාර්තා වේ.
රංජිත් කුමාර හෙවත් ‘කොණ්ඩ රංජි’ 2026 අප්රේල් 09 වැනිදා ඩුබායි හිදී අත්අඩංගුවට පත්ව ඇත්තේ ඉරාන ජාතිකයකු සමඟ සිදුකළ මහා පරිමාණ මත්ද්රව්ය ගනුදෙනුවක් අතරතුරදීය. ඔහු සමඟ වනාතේ දුමින්ද, අකිල, සුදු, ජොන්ටි සහ ලූනා ඇතුළු සහචරයන් පිරිසක් ද කොටු වී ඇති අතර, කඳාන ප්රදේශයේ සිදුවූ වෙඩි තැබීම් සහ පාතාල කල්ලිවලට ස්වයංක්රීය ගිනි අවි සැපයීම සම්බන්ධයෙන් මොහුට ප්රධාන චෝදනා එල්ල වී තිබේ. එසේම, ගල්ලෙවත්ත ගමගේ චමින්ද දිල්රුක් හෙවත් ‘පරෙවි සුදා’ අප්රේල් 12 වැනිදා ඩුබායි සිට බෝට්ටුවකින් පකිස්ථානයට පලායාමට උත්සාහ කිරීමේදී අත්අඩංගුවට ගෙන ඇත. බොරැල්ල සහ වනාතමුල්ල කේන්ද්ර කරගත් මත්ද්රව්ය ජාලයේ ප්රධානියා වන ඔහු, රුපියල් බිලියන 10කට අධික මත්ද්රව්ය සහ ගිනි අවි තොගයක් මෙරටට ගෙන්වීමේ සිද්ධියකට ද සම්බන්ධ බවට සැක කෙරේ.
පොලිස් විශේෂ කාර්ය බලකායේ සහ හමුදා විශේෂ බලකායේ පුහුණුව ලැබූ දරුණු ගණයේ කුලී ඝාතකයෙකු වන සෝබනාහන්දි සනත් ද සිල්වා හෙවත් ‘මීටියාගොඩ රාජු’, ඉන්දියාවේ නවදිල්ලි නුවර හෝටලයක සැඟව සිටියදී අප්රේල් 13 වැනිදා අත්අඩංගුවට ගෙන තිබේ. ‘හිත හොඳ දොස්තර’ ඝාතනය ඇතුළු දකුණු පළාතේ සිදුවූ මිනීමැරුම් 15කට අධික සංඛ්යාවකට මොහු සම්බන්ධ බවට පොලිසිය හඳුනාගෙන ඇත. මේ අතර, මෙරටට ‘අයිස්’ (Ice) මත්ද්රව්ය බෙදාහරින ප්රධාන සැපයුම්කරුවෙකු වන මනෝජ් සුරංග ලියනගේ හෙවත් ‘බටුවත්තේ චාමර’ බහරේන් රාජ්යයේදී එරට නීතිය උල්ලංඝනය කිරීමේ චෝදනාව මත අත්අඩංගුවට ගෙන ඇති අතර මීගමුව, ගම්පහ සහ රාගම ප්රදේශ කේන්ද්ර කරගත් මහා පරිමාණ මත්ද්රව්ය ජාලයක් ඔහු විසින් මෙහෙයවා ඇත.
මැදපෙරදිග කලාපයේ පවතින යුදමය වාතාවරණය හමුවේ එම රටවල ආරක්ෂක අංශ අපරාධකරුවන් කෙරෙහි දැඩි අවධානයක් යොමු කිරීම මෙම අත්අඩංගුවට ගැනීම්වලට ප්රධාන හේතුවක් වී තිබේ. මෙම අපරාධකරුවන් මෙරටට රැගෙන ඒම තුළින් දැනට ක්රියාත්මක මත්ද්රව්ය සහ පාතාල ජාලයන් රැසක් සම්පූර්ණයෙන් අඩපණ කිරීමට හැකි වනු ඇතැයි ආරක්ෂක අංශ විශ්වාසය පළ කරයි.
