අද (අප්රේල් 20) පස්වරුවේ ජපානයේ උතුරු සහ ඊසානදිග වෙරළට ඔබ්බෙන් රික්ටර් මාපක 7.7ක ප්රබල භූ කම්පනයක් සිදුව ඇති අතර, ඉන් අනතුරුව ඉදිරි සතිය තුළ රික්ටර් මාපක 8ක් හෝ ඊට වැඩි ප්රබලත්වයකින් යුත් “දැවැන්ත භූ කම්පනයක්” (Mega-quake) ඇතිවීමේ අවදානමක් පවතින බව ජපාන කාලගුණ විද්යා ඒජන්සිය (JMA) නිල වශයෙන් අනතුරු අඟවා තිබේ.
මුලින් රික්ටර් මාපක 7.4ක් ලෙස වාර්තා වුවද, පසුව එය 7.7ක් දක්වා සංශෝධනය කෙරිණි. මෙම කම්පනය ජපානයේ සැන්රිකු (Sanriku) වෙරළට ඔබ්බෙන් කිලෝමීටර් 19ක් පමණ ගැඹුරු මුහුදේ හටගෙන ඇති අතර, ඒ සමඟම ජපානයේ උතුරුදිග වෙරළට සුනාමි අවදානමක් නිකුත් කෙරිණි. ඉවාටේ (Iwate) ප්රාන්තයේ කුජි වරායට සෙන්ටිමීටර් 80ක සහ මියාකෝ වරායට සෙන්ටිමීටර් 40ක පමණ පළමු සුනාමි රළ ළඟා වූ බව විදෙස් මාධ්ය වාර්තා කරයි.
ජපාන රජය විසින් 2011 වසරේ සිදුවූ මහා විනාශයෙන් උගත් පාඩම් පදනම් කරගනිමින්, “හොක්කයිඩෝ සහ සැන්රිකු වෙරළට ඔබ්බෙන් පසුකාලීන භූ කම්පන උපදේශනය” නිකුත් කර තිබේ. මෙය 2022 වසරේදී මෙම ක්රමය හඳුන්වා දීමෙන් පසු නිකුත් කළ දෙවන අවස්ථාවයි. ඉදිරි දින හතක කාලය තුළ රික්ටර් මාපක 8ක් හෝ ඊට වැඩි ප්රබල භූ කම්පනයක් ඇතිවීමේ සම්භාවිතාව සාමාන්ය කාලයට වඩා ඉහළ ගොස් ඇති බවත්, ඒ පිළිබඳව දැඩි විමසිල්ලෙන් සිටින ලෙසත් ජපාන අග්රාමාත්ය සානේ ටකායිචි මහත්මිය ජනතාවගෙන් ඉල්ලා සිටියාය.
හොක්කයිඩෝ, අයෝමෝරි, ඉවාටේ, මියාගි සහ ෆුකුෂිමා යන ප්රාන්තවල පුද්ගලයන් 172,000කට පමණ ආරක්ෂිත ස්ථාන කරා යන ලෙස උපදෙස් දී ඇති අතර ටෝකියෝ සහ ෂින්-අයෝමෝරි අතර ෂින්කන්සන් (Shinkansen) අධිවේගී දුම්රිය සේවා ද තාවකාලිකව අත්හිටුවා තිබේ. කෙසේ වෙතත්, ප්රදේශයේ පිහිටි න්යෂ්ටික බලාගාරවල කිසිදු අසාමාන්ය තත්ත්වයක් මෙතෙක් වාර්තා වී නොමැති බව බලධාරීන් තහවුරු කරයි.
