වසර දෙකක කාලයක් පුරා පැවති යුධ ගැටුම්වලින් විනාශ වූ ගාසා තීරයේ යටිතල පහසුකම් සහ සැපයුම් දාම කළමනාකරණය කිරීම සම්බන්ධයෙන්, ඇමෙරිකානු ජනාධිපති ඩොනල්ඩ් ට්රම්ප්ගේ “සාම මණ්ඩලය” (Board of Peace) සහ ඩුබායි රාජ්යයට අයත් DP World සමාගම අතර සාකච්ඡා පවත්වා ඇති බව ෆිනෑන්ෂල් ටයිම්ස් (FT) පුවත්පත වාර්තා කරයි.
ගාසා තීරයේ ගොඩනැගිලිවලින් පහෙන් හතරක් පමණ විනාශ වී ඇති අතර, එය යළි ගොඩනැගීම සඳහා ඇමෙරිකානු ඩොලර් බිලියන 70ක පමණ පිරිවැයක් දැරීමට සිදුවනු ඇතැයි ජාත්යන්තර ආයතන ඇස්තමේන්තු කර ඇත. මෙම දැවැන්ත ව්යාපෘතියේ ලොජිස්ටික් සහ යටිතල පහසුකම් කළමනාකරණය සඳහා DP World සමාගමේ සහාය ලබාගැනීම පිළිබඳව මෙහිදී අවධානය යොමු වී තිබේ.
මානුෂීය ආධාර සහ අනෙකුත් භාණ්ඩ ගාසා තීරයට ඇතුළු කිරීමේදී අවශ්ය වන ගබඩා පහසුකම්, ලුහුබැඳීමේ පද්ධති සහ ආරක්ෂක කටයුතු සම්බන්ධයෙන් දෙපාර්ශවය අතර අදහස් හුවමාරු වී ඇත. මීට අමතරව, ගාසා තීරයේ හෝ ඒ අසල ඊජිප්තු වෙරළ තීරයේ නව වරායක් ඉදිකිරීම සහ නිදහස් වෙළඳ කලාපයක් (Free-trade zone) ඇති කිරීම පිළිබඳව ද යෝජනා ඉදිරිපත් වී ඇති බව වාර්තා වේ.
එක්සත් අරාබි එමීර් රාජ්යය පදනම් කරගත් DP World සමාගම සහ ධවල මන්දිරය මේ සම්බන්ධයෙන් මෙතෙක් නිල ප්රකාශයක් නිකුත් කර නොමැති වුවත්, මෙය ගාසා තීරයේ අනාගතය පිළිබඳ තීරණාත්මක පියවරක් වනු ඇතැයි විශ්වාස කෙරේ.
