ශ්රී මහා බෝධීන් වහන්සේගේ බෝධි අංකුරයක් ඇමරිකා එක්සත් ජනපදය වෙත වැඩම කරවීම, එරට බුදු දහම ප්රචලිත කිරීම සඳහා ශ්රී ලංකාව රාජ්ය තාන්ත්රිකව දක්වන දායකත්වය සංකේතවත් කරන බව පූජ්ය ආචාර්ය මේල්පිටියේ විමලකිත්ති ස්වාමීන් වහන්සේ පවසති. ලෝක සාම පාගමන පිළිබඳව අත්තනගල්ල රජමහා විහාරස්ථානයේ අද (21) පැවැති මාධ්ය සාකච්ඡාවකදී උන්වහන්සේ මෙම අදහස් පළ කළහ.
මෙම පාගමන සම්පූර්ණයෙන්ම සාමය තේමා කරගත් එකක් බැවින්, ඊට අවහිර වන ලෙස කටයුතු කිරීමෙන් වළකින ලෙසත්, ස්වාමීන් වහන්සේලා වඩින මාර්ගය හරහා ගමන් නොකරන ලෙසත් උන්වහන්සේ මහජනතාවගෙන් ඉල්ලා සිටිති. මෙය ඉතා ගෞරවනීය සහ ආගමික වටිනාකමකින් යුතු අවස්ථාවක් බැවින් ජනතාවගේ සහයෝගය ඊට අත්යවශ්ය බව උන්වහන්සේ පෙන්වා දුන්හ.
මෙම සාම පාගමන නිමාවීමෙන් අනතුරුව, වැඩම කළ ස්වාමීන් වහන්සේලා මැයි මස 01 වැනි දින දක්වා කොළඹ හුණුපිටිය ගංගාරාම විහාරස්ථානයේ වැඩ සිටිනු ඇත. එම කාලසීමාව තුළ සැදැහැවත් ජනතාවට උන්වහන්සේලා බැහැදැකීමට සහ ආගමික වත්පිළිවෙත්වලට සම්බන්ධ වීමට අවස්ථාව පවතින බව ද විමලකිත්ති හිමියෝ වැඩිදුරටත් සඳහන් කළහ.
