ඉන්දු පැසිෆික් සාගර කලාපයේදී ඇමෙරිකානු එක්සත් ජනපදය විසින් සැකකටයුතු නෞකාවක් අත්අඩංගුවට ගෙන ඇති අතර, එය චීනය විසින් ඉරානය වෙත ලබාදුන් “තෑග්ගක්” බවට ජනාධිපති ඩොනල්ඩ් ට්රම්ප් චෝදනා කරයි. මෙම සිදුවීමත් සමඟ මැදපෙරදිග ආතතිය හමුවේ චීනය සහ ඉරානය අතර පවතින ආරක්ෂක සබඳතා පිළිබඳව ජාත්යන්තර අවධානය යොමු වී තිබේ.
අත්අඩංගුවට ගත් නෞකාව තුළ “යහපත් නොවන දෑ” තිබූ බව පවසන ජනාධිපති ට්රම්ප්, චීන ජනාධිපති ෂී ජින්පින් සමඟ තමන් පවත්වන සමීප සබඳතාව මෙවැනි ක්රියා හමුවේ අභියෝගයට ලක්ව ඇති බව CNBC පුවත් සේවය සමඟ පැවති සම්මුඛ සාකච්ඡාවකදී ප්රකාශ කර ඇත. “යුද්ධය කියන්නේ ඔහොම තමයි” යනුවෙන් ඔහු එහිදී සඳහන් කළේය.
සටන් විරාම කාලය තුළ ඉරානය නැවත අවි තොග රැස්කර ගන්නට ඇති බවට සැක කරන ට්රම්ප්, ඉරානයේ හමුදා මෙහෙයුම් අඩපණ කිරීම සඳහා එරට පාලම්වලට බෝම්බ හෙලන බවට ද තර්ජනය කර තිබේ. චීනය විසින් ඉදිරි සති කිහිපය තුළ ඉරානයට නව ගුවන් ආරක්ෂක පද්ධති ලබා දීමට සූදානම් වන බවට ඇමෙරිකානු බුද්ධි අංශ අනාවරණය කර ඇති බව CNN පුවත් සේවය ද වාර්තා කර ඇත.
ඉරානයට ගුවන් ආරක්ෂක අවි සපයන බවට එල්ල වන චෝදනා චීනය ප්රතික්ෂේප කරයි. කෙසේ වෙතත්, චීනය දිගින් දිගටම ඉරානයට අවි සපයන්නේ නම් චීන භාණ්ඩ සඳහා අමතර 50% ක තීරුබදු පැනවීමට ට්රම්ප් සූදානම් වන බවට අනතුරු අඟවා තිබේ. ඊට ප්රතිචාර දක්වමින් චීනය පවසා ඇත්තේ ඇමෙරිකාව එවැනි පියවරක් ගන්නේ නම් තමන් ද “ප්රතිප්රහාරාත්මක” ආර්ථික පියවර ගන්නා බවයි.
