වර්ජිනියා ප්රාන්තයේ කොංග්රස් මණ්ඩල සිතියම ඩිමොක්රටික් පාක්ෂිකයන්ට වාසි සහගත වන පරිදි නැවත සකස් කිරීමට ගෙන ආ යෝජනාව “වංචනික” (Rigged) එකක් බවට ඇමෙරිකානු ජනාධිපති ඩොනල්ඩ් ට්රම්ප් මහතා බදාදා චෝදනා කළේය. මේ අතරතුර ප්රාන්ත විනිසුරුවරයෙකු විසින් අදාළ නව සිතියම ක්රියාත්මක කිරීම වළක්වමින් නියෝගයක් නිකුත් කර තිබේ.
පසුගිය අඟහරුවාදා වර්ජිනියා වැසියන් විසින් අනුමත කරන ලද මෙම කොට්ඨාස නැවත බෙදා වෙන් කිරීමේ ජනමත විචාරණය හරහා දැනට රිපබ්ලිකන් පාක්ෂිකයන් සතු ආසන හතරක් දක්වා ප්රමාණයක් ඩිමොක්රටික් පාක්ෂිකයන් වෙත හිමි වීමේ අවස්ථාව පවතී. මෙය නොවැම්බර් මාසයේ පැවැත්වෙන සභා පාලනය දිනා ගැනීමට ඩිමොක්රටික් පාක්ෂිකයන්ට විශාල රුකුලක් වනු ඇත.
තමන් අකමැති මැතිවරණ ප්රතිඵල පිළිබඳව සැක මතු කිරීමේ පුරුද්ද දිගටම පවත්වාගෙන යමින් ට්රම්ප් මහතා සමාජ මාධ්ය ඔස්සේ ප්රකාශ කළේ තැපැල් ඡන්ද (Mail-in ballots) හේතුවෙන් මෙම ප්රතිඵලය විකෘති වී ඇති බවයි. කෙසේ වෙතත් ඒ සඳහා ඔහු කිසිදු සාක්ෂියක් ඉදිරිපත් කර නොමැත.
මේ අතර රිපබ්ලිකන් ජාතික කමිටුව (RNC) ගොනු කළ නඩුවකට අනුව පරිපථ මහාධිකරණ විනිසුරු ජැක් හර්ලි (Jack Hurley Jr.) විසින් මෙම නව සිතියම සහතික කිරීම වළක්වා තිබේ. විනිසුරුවරයා පෙන්වා දුන්නේ මෙම සංශෝධනය සඳහා අනුගමනය කළ යුතු ව්යවස්ථාපිත රීතීන් මන්ත්රීවරුන් විසින් නිසි ලෙස අනුගමනය කර නොමැති බවයි. ඔහු මැතිවරණ පත්රිකාවේ සඳහන් භාෂාව “නොමඟ යවන සුළු” එකක් බව ද අවධාරණය කළේය.
වර්ජිනියා ප්රාන්තයේ නීතිපති ජේ ජෝන්ස් (Jay Jones) ප්රකාශ කළේ විනිසුරුවරයාගේ මෙම නියෝගයට එරෙහිව අභියාචනාධිකරණයට යන බවයි. 2020 ජනාධිපතිවරණයේදී ද පුළුල් වංචාවක් සිදුවූ බව පවසමින් මැතිවරණ ක්රමය කෙරෙහි පවතින ජනතා විශ්වාසය බිඳ දැමීමට ට්රම්ප් මහතා උත්සාහ කළ බවට රොයිටර් පුවත් සේවය පෙන්වා දෙයි.
මෙම අර්බුදය හමුවේ නොවැම්බර් මැතිවරණයට පෙර වර්ජිනියා ප්රාන්තයේ දේශපාලන සිතියම කුමන ආකාරයකට සැකසෙනු ඇත්ද යන්න පිළිබඳව මුළු ඇමෙරිකාවේම අවධානය යොමු වී තිබේ.
