ලබන ඉරිදා අවසන් වීමට නියමිත දින 10ක තාවකාලික සටන් විරාමය තවදුරටත් දීර්ඝ කර ගැනීම සඳහා ලෙබනන සහ ඊශ්රායල නියෝජිතයන් අතර දෙවන වටයේ සාකච්ඡා අද (අප්රේල් 23) වොෂින්ටන් නුවරදී පැවැත්වේ. ඇමරිකානු මැදිහත් වීමෙන් පැවැත්වෙන මෙම සාකච්ඡා ඉතා තීරණාත්මක වන්නේ පසුගිය බදාදා එල්ල වූ ප්රහාරවලින් මාධ්යවේදිනියක ඇතුළු පස් දෙනෙකු මියයාමත් සමඟ කලාපීය නොසන්සුන්තාව යළිත් වර්ධනය වී ඇති පසුබිමකයි.
අප්රේල් 16 වනදා සිට ක්රියාත්මක වූ මෙම සටන් විරාමය තුළ ප්රචණ්ඩ ක්රියා යම් මට්ටමකට අඩු වුවද, දකුණු ලෙබනනයේ ඊශ්රායලය විසින් ප්රකාශිත ආරක්ෂිත කලාපය (Buffer zone) තුළ තවදුරටත් ගැටුම් වාර්තා වේ. පසුගිය බදාදා දිනය සටන් විරාමයෙන් පසු වාර්තා වූ දරුණුතම දිනය ලෙස සැලකෙන අතර, එහිදී ලෙබනන ‘අල්-අක්බාර්’ පුවත්පතේ මාධ්යවේදිනී අමල් කලීල් (Amal Khalil) ද ජීවිතක්ෂයට පත්ව ඇත.
මාර්තු 2 වනදා ආරම්භ වූ මෙම ගැටුම් මැදපෙරදිග කලාපීය යුද්ධයේම කොටසක් ලෙස සැලකෙන අතර, ඉරානය පවසා සිටින්නේ ඕනෑම සාම ගිවිසුමකට ලෙබනනය ද ඇතුළත් විය යුතු බවයි. කෙසේ වෙතත්, වොෂින්ටනය උත්සාහ කරන්නේ ඉරානය සමඟ පවතින ගැටුමෙන් බැහැරව ලෙබනන සීමාවේ ස්ථාවර සාමයක් ඇති කිරීමටයි. ලෙබනන රජය මෙම සටන් විරාමය දීර්ඝ කර ගැනීමට දැඩි උත්සාහයක නිරත වන අතර, හෙස්බුල් සංවිධානය පවසන්නේ තමන්ට එරෙහි වන බලවේගවලට ප්රතිප්රහාර දීමේ අයිතිය තමන් සතු බවයි.
