ස්පාඤ්ඤයේ උතුරුදිග ප්රදේශයේ පිහිටි බර්ගෝස් විශ්වවිද්යාල රෝහලේ (University Hospital of Burgos) සිදුවූ බරපතල ඖෂධ මාත්රාවක දෝෂයක් හේතුවෙන් ප්රතිකාර ලබමින් සිටි තෙවැනි පිළිකා රෝගියාත් මියගොස් ඇති බව වාර්තා වේ. මාස කිහිපයක් තිස්සේ අසාධ්ය තත්ත්වයේ පසු වූ මෙම රෝගියා අධික ඖෂධ මාත්රාවක් (Overdose) ශරීරගත වීම නිසා ඇති වූ සංකූලතා හේතුවෙන් මෙලෙස ජීවිතක්ෂයට පත්ව ඇත.
පසුගිය දෙසැම්බර් මාසයේදී පිළිකා රෝගීන් පස් දෙනෙකුට නියමිත ප්රමාණයට වඩා බෙහෙවින් වැඩි ඖෂධ මාත්රාවක් ලබා දීම නිසා මෙම අනතුර සිදු විය. ඖෂධය සකස් කිරීමේදී සාන්ද්රණය (Concentration) වැරදි ලෙස මිශ්ර කිරීම හේතුවෙන් රෝගීන් පස් දෙනාටම අධික මාත්රාවක් ශරීරගත වී තිබේ. ප්රතිකාර ලැබූ රෝගීන් පස් දෙනාගෙන් දෙදෙනෙකු එම අවස්ථාවේදීම මියගිය අතර, තෙවැනි රෝගියා දැඩි සත්කාර ඒකකයේ ප්රතිකාර ලබමින් සිටියදී මෙලෙස මියගොස් ඇත. අනෙක් රෝගීන් දෙදෙනාගේ තත්ත්වය යහපත් වූ බැවින් ඔවුන් රෝහලෙන් පිටව ගොස් තිබේ.
මෙම සිදුවීම වෘත්තීය නොසලකා හැරීමක් ලෙස සලකා ස්පාඤ්ඤ බලධාරීන් මේ වන විට අධිකරණ පරීක්ෂණයක් ආරම්භ කර ඇත. මෙම බරපතල වරදට වගකිව යුතු පාර්ශ්වයන් හඳුනා ගැනීම සඳහා පුළුල් විමර්ශන ක්රියාත්මක වේ.
