ලෝක වෙළෙඳ පොළේ බලවතුන් පවා යුද බියෙන් වෙලී සිටින මොහොතක, ශ්රී ලංකාවේ ආර්ථික ස්ථාවරත්වය පිළිබඳ තීරණාත්මක දත්ත කිහිපයක් මේ වන විට කරළියට පැමිණ තිබේ. මැදපෙරදිග කලාපයේ පවතින උණුසුම් යුද වාතාවරණය මෙරට විදේශ ආදායම් මාර්ගවලට සෘජු බලපෑම් එල්ල කරමින් පවතින පසුබිමක, පසුගිය මාර්තු මාසයේ අපනයන ක්ෂේත්රයේ සිදුවූ මෙම හැරවුම් ලක්ෂ්යය පිළිබඳව අපනයන සංවර්ධන මණ්ඩලය සිය විශේෂ අනාවරණය සිදුකර ඇත. කලාපීය අර්බුද හමුවේ වුවද අපනයන ආදායම යම් මට්ටමක රඳවා ගැනීමට සමත් වුවත්, එහි සැඟවුණු අහිතකර බලපෑම් මේ වන විට සංඛ්යාලේඛන මඟින් මතු කර පෙන්වයි.
අපනයන සංවර්ධන මණ්ඩලයේ ප්රධාන විධායක නිලධාරී මංගල විජේසිංහ මහතා සඳහන් කරන පරිදි, ඉකුත් මාර්තු මාසයේදී මෙරට අපනයන ආදායම අමෙරිකානු ඩොලර් මිලියන 1,467ක් දක්වා ඉහළ නංවා ගැනීමට හැකිව තිබේ. මෙය පෙබරවාරි මාසයට සාපේක්ෂව 9%ක වර්ධනයක් වුවද, පසුගිය වසරේ මාර්තු මාසයට සාපේක්ෂව අපනයන ආදායම 5.2%කින් පහත වැටී ඇත්තේ මැදපෙරදිග අර්බුදය හේතුවෙන් එම කලාපයට සිදුකරන අපනයන ආදායම 48%ක් වැනි දැවැන්ත ප්රතිශතයකින් කඩා වැටීම නිසාවෙනි. විශේෂයෙන්ම වෙළෙඳ භාණ්ඩ අපනයනයෙන් ඩොලර් මිලියන 1,180ක් සහ සේවා අපනයනයෙන් ඩොලර් මිලියන 286ක් බැගින් උපයාගැනීමට මෙරට අපනයනකරුවන් සමත්ව ඇත.
මෙම අභියෝගාත්මක කාලසීමාව තුළ වුවද පොල් ආශ්රිත නිෂ්පාදන, ඉලෙක්ට්රොනික්, ආහාරපාන සහ තොරතුරු තාක්ෂණ වැනි ක්ෂේත්රවල කැපී පෙනෙන පිම්මක් දැකගත හැකි වීම මෙරට ආර්ථිකයට මහත් ශක්තියකි. ලතින් අමෙරිකානු වෙළෙඳ පොළේ පසුබැසීමක් තිබුණද යුරෝපීය, අප්රිකානු සහ ආසියානු රටවල ශ්රී ලංකා නිෂ්පාදන සඳහා පවතින ඉල්ලුම ඉහළ ගොස් තිබීම සුවිශේෂී කරුණකි. ලෝක දේශපාලන අර්බුද හමුවේ වුවද නොසැලී ඉදිරියට යන මෙරට අපනයනකරුවන්ගේ දිරිය, රටක් ලෙස අප හමුවේ පවතින එකම බලාපොරොත්තුව බව නොඅනුමානය.
