එල් සැල්වදෝරයේ ජනාධිපති නයිබ් බුකේලේ විසින් ක්රියාත්මක කරන දැඩි මර්දනකාරී වැඩපිළිවෙළ යටතේ, එරට ඉතිහාසයේ විශාලතම සමූහ නඩු විභාගය ආරම්භ වී තිබේ. මෙහිදී අපරාධ කල්ලි සාමාජිකයන් ලෙස සැකකෙරෙන පුද්ගලයන් 486 දෙනෙකුට එරෙහිව චෝදනා ඉදිරිපත් කර ඇත.
අත් සහ පාද විලංගු දැමූ සිරකරුවන් සියයකට අධික පිරිසක් එරට “ත්රස්තවාදී රැඳවුම් මධ්යස්ථානයේ” (CECOT) සිට විශාල තිරයක් හරහා අධිකරණ කටයුතු නිරීක්ෂණය කරන අයුරු රොයිටර් පුවත් සේවය වාර්තා කර ඇත. මෙය එරට නීතියට අනුව සිදුකෙරෙන දැවැන්තම සමූහ නඩු විභාගය ලෙස සැලකේ. රජයේ නීතිඥයින් පවසන පරිදි, MS-13 සහ Barrio 18 යන අපරාධ කල්ලිවලට සම්බන්ධ මෙම සැකකරුවන් විසින් 2012 සහ 2022 අතර කාලය තුළ අපරාධ 47,000කට අධික ප්රමාණයක් සිදු කර ඇත.
2022 වසරේ සිට ක්රියාත්මක හදිසි නීති තත්ත්වය යටතේ එල් සැල්වදෝරය විසින් පුද්ගලයන් 91,000කට අධික පිරිසක් අත්අඩංගුවට ගෙන තිබේ. ලතින් ඇමෙරිකානු කලාපය තුළ මෙලෙස සමූහ නඩු විභාග සඳහා අවසර දී ඇති එකම රට එල් සැල්වදෝරයයි. මෙම මර්දනකාරී පියවර නිසා එරට අපරාධ අනුපාතය සැලකිය යුතු ලෙස අඩු වී ඇති අතර බුකේලේ ජනාධිපතිවරයා ජනප්රිය වී ඇතත්, වරදකරුවන් නොවන පුද්ගලයන් පවා අත්අඩංගුවට ගෙන ඇති බවට සහ ව්යවස්ථාපිත අයිතීන් උල්ලංඝනය වන බවට ජාත්යන්තර මානව හිමිකම් සංවිධාන චෝදනා කරයි. මෙම අධි-ආරක්ෂිත බන්ධනාගාර පද්ධතිය සහ සමූහ නඩු විභාග ක්රමය බුකේලේ රජයේ “ශුන්ය ඉවසීමේ” ප්රතිපත්තියේ සංකේතයක් බවට පත්ව ඇත.
