වෙනිසියුලානු හිටපු ජනාධිපති නිකොලස් මදුරෝ (Nicolas Maduro) අත්අඩංගුවට ගැනීමේ මෙහෙයුමට සම්බන්ධ වූ අමෙරිකානු හමුදා සෙබළෙකු, එම මෙහෙයුමට අදාළ රහසිගත තොරතුරු භාවිත කරමින් ඔට්ටු අල්ලා අයුතු ලෙස මුදල් ඉපයීමේ චෝදනාව මත අත්අඩංගුවට ගෙන තිබේ.
අමෙරිකානු විශේෂ බලකායේ (U.S. Army Special Forces) මාස්ටර් සැරයන්වරයෙකු වන 38 හැවිරිදි ගැනන් කෙන් වැන් ඩයික් (Gannon Ken Van Dyke), මදුරෝ අත්අඩංගුවට ගැනීමට පෙර ඒ පිළිබඳව තිබූ රහසිගත තොරතුරු භාවිත කරමින් ‘Polymarket’ නමැති අනාවැකි පළකරන වෙබ් අඩවියක (Prediction Market) ඔට්ටු අල්ලා තිබේ. අමෙරිකානු හමුදා වෙනිසියුලාවට ඇතුළු වන බවටත්, මදුරෝ බලයෙන් පහ වන බවටත් ඔහු තැබූ ඔට්ටු මගින් ඩොලර් 400,000ක (ආසන්න වශයෙන් රුපියල් කෝටි 12ක් පමණ) ලාභයක් උපයා ඇත.
මොහුට එරෙහිව රජයේ රහසිගත තොරතුරු පෞද්ගලික ලාභ ප්රයෝජන සඳහා භාවිත කිරීම, වංචා කිරීම සහ නීති විරෝධී මූල්ය ගනුදෙනු සිදු කිරීම යන චෝදනා යටතේ නිව්යෝර්ක් අධිකරණයක නඩු පවරා ඇත. අමෙරිකානු අධිකරණ දෙපාර්තමේන්තුව මෙවැනි අනාවැකි පළකරන වෙබ් අඩවියක් හරහා සිදුකළ “අභ්යන්තර තොරතුරු භාවිත කර වෙළඳාම් කිරීම” (Insider Trading) සම්බන්ධයෙන් නඩු පැවරූ පළමු අවස්ථාව මෙය ලෙස සැලකේ.
හමුදා නිලධාරීන්ට ලබා දෙන රහසිගත තොරතුරු මෙහෙයුම්වල ආරක්ෂාව සඳහා මිස පෞද්ගලික ධනය ඉපයීමට නොවන බව අමෙරිකානු වැඩබලන නීතිපති ටොඩ් බ්ලාන්ච් (Todd Blanche) අවධාරණය කර ඇත.
