හයිටි රාජ්යයේ යෝජිත කල්ලි මර්දන බලකාය (Gang Suppression Force) යෙදවීමට අදාළ අවබෝධතා ගිවිසුම් පිළිබඳ සාකච්ඡා කිරීම සඳහා ශ්රී ලංකා ආරක්ෂක ලේකම් එයාර් වයිස් මාර්ෂල් සම්පත් තුයියකොන්ත (විශ්රාමික) මහතා ඇතුළු ඉහළ පෙළේ දූත පිරිසක් පසුගියදා නිව්යෝර්ක් නුවර පිහිටි එක්සත් ජාතීන්ගේ මූලස්ථානයේදී නිල හමුවීම් කිහිපයක නිරත වූහ. මෙහිදී ක්රියාන්විත සහය පිළිබඳ එක්සත් ජාතීන්ගේ උප මහලේකම් අතුල් කාරේ මහතා සහ මෙහෙයුම් සහය දෙපාර්තමේන්තුවේ නිල ඇඳුම් සන්නද්ධ බලකායන් පිළිබඳ අධ්යක්ෂ මයිකල් මුලින්ගේ කිටීවි මහතා ඇතුළු ජ්යෙෂ්ඨ නිලධාරීන් සමඟ ආරක්ෂක ලේකම්වරයා දීර්ඝ වශයෙන් අදහස් හුවමාරු කර ගත්තේය.
මෙම සංචාරය අතරතුර එක්සත් ජාතීන්ගේ මානව හිමිකම් යාන්ත්රණයේ නියෝජිතයන්ද හමුවූ දූත පිරිස, හයිටි රාජ්යය තුළ ශ්රී ලංකා භට පිරිස් යෙදවීමේදී පවතින මෙහෙයුම් සූදානම සහ ජාත්යන්තර ප්රමිතීන්ට අනුකූල වීම පිළිබඳ කරුණු පැහැදිලි කරන ලදී. විශේෂයෙන්ම එක්සත් ජාතීන්ගේ මානව හිමිකම් අවශ්යතාවලට ගරු කරමින් මෙම මෙහෙයුම් කටයුතු සිදු කිරීමේ වැදගත්කම පිළිබඳව මෙහිදී විශේෂ අවධානයක් යොමු වූ අතර, දෙපාර්ශවය අතර පවතින සහයෝගීතාව තවදුරටත් ශක්තිමත් කර ගැනීම පිළිබඳවද මෙහිදී එකඟතාවකට පැමිණ තිබේ.
