කෘත්රිම බුද්ධි (AI) තාක්ෂණය භාවිතයේදී මූල්ය පද්ධතිය තුළ ඇති විය හැකි සයිබර් ආරක්ෂණ අවදානම් හඳුනාගෙන ඒවාට පිළියම් යෙදීම සඳහා විශේෂ කාර්ය සාධක බලකායක් (Task force) පිහිටුවීමට ජපාන රජය තීරණය කර තිබේ. විශේෂයෙන්ම ‘ඇන්ත්රොපික්’ (Anthropic) සමාගමේ ‘Mythos AI’ මාදිලිය හා සම්බන්ධ විය හැකි ආරක්ෂක දුර්වලතා පිළිබඳව මතුව ඇති කනස්සල්ල මෙම තීරණයට ප්රධානතම හේතුව වී ඇති බව ජපාන මුදල් අමාත්ය සත්සුකි කටයාමා මහත්මිය අද (24) ප්රකාශ කළාය.
ජපාන මූල්ය සේවා නියෝජිතායතනය, ජපාන මහ බැංකුව, ජාතික සයිබර් ආරක්ෂණ කාර්යාලය මෙන්ම එරට ප්රමුඛතම බැංකු ත්රිත්වය සහ ජපාන කොටස් හුවමාරු සමූහය (Japan Exchange Group) එක්ව මෙම බලකාය මෙහෙයවනු ඇත. මූල්ය ගනුදෙනුවල ආරක්ෂාව තහවුරු කිරීම සහ AI තාක්ෂණය හරහා සිදුවිය හැකි සයිබර් ප්රහාර වළක්වා ගැනීම සඳහා වන නව ප්රමිතීන් සහ නීති රීති සකස් කිරීම මෙම බලකායේ ප්රමුඛ කාර්යය වනු ඇත. තාක්ෂණික දියුණුවත් සමඟ මූල්ය ක්ෂේත්රයට එල්ල විය හැකි නවීන පන්නයේ තර්ජන හමුවේ ජාතික මූල්ය ස්ථාවරත්වය ආරක්ෂා කර ගැනීම ජපානයේ අරමුණයි.
