බ්රිතාන්යයේ තෙවැනි චාල්ස් රජු ලබන සතියේ වොෂින්ටන් නුවර සිදුකරන නිල සංචාරයේදී ඉරාන යුද්ධය, නේටෝ සංවිධානයේ ක්රියාකාරීත්වය සහ බ්රිතාන්යයේ ඩිජිටල් සේවා බදු (Digital Services Tax) සම්බන්ධයෙන් සාකච්ඡා කිරීමට බලාපොරොත්තු වන බව ඇමෙරිකානු ජනාධිපති ඩොනල්ඩ් ට්රම්ප් පවසයි. රොයිටර් පුවත් සේවය සමඟ පැවැත්වූ සම්මුඛ සාකච්ඡාවකදී ජනාධිපතිවරයා සඳහන් කළේ චාල්ස් රජු තමාගේ සමීප මිතුරෙකු බවත්, මෙම හමුවේදී දෙරටට වැදගත් වන සියලු කරුණු විවෘතව කතා කරන බවත්ය.
ලබන සඳුදා ආරම්භ වන මෙම සිව්දින සංචාරය ඇමෙරිකාව බ්රිතාන්යයෙන් නිදහස ලබා වසර 250ක් සපිරීම නිමිත්තෙන් සංවිධානය කර ඇත. චාල්ස් රජු මෙහිදී වර්ජිනියා සහ නිව්යෝර්ක් යන නගරවල සංචාරය කිරීමට නියමිත අතර, ඇමෙරිකානු කොංග්රස් මණ්ඩලය ඇමතීමට ද සැලසුම් කර තිබේ. කෙසේ වෙතත්, මෙම සංචාරය සිදුවන්නේ 1956 සූවස් අර්බුදයෙන් පසු ඇමෙරිකාව සහ බ්රිතාන්යය අතර සබඳතා ඉතාම පලුදු වී ඇති පසුබිමක වීම විශේෂත්වයකි.
ඉරානයට එරෙහි ප්රහාර සඳහා බ්රිතාන්ය අගමැති කීර් ස්ටාර්මර් සහාය ලබා නොදීම සහ බ්රිතාන්යයේ මිලිටරි ශක්තිය පිළිබඳව ට්රම්ප් කළ විවේචන හේතුවෙන් දෙරට අතර රාජ්යතාන්ත්රික ගැටලු උත්සන්න වී තිබේ. මීට අමතරව, බ්රිතාන්යය විසින් පනවා ඇති ඩිජිටල් සේවා බදු ඉවත් නොකරන්නේ නම් එරටට එරෙහිව දැඩි වෙළඳ බදු පනවන බවට ද ට්රම්ප් අනතුරු අඟවා ඇත. චාල්ස් රජුගේ මෙම සංචාරය දෙරට අතර පවතින මෙම නොසන්සුන්කාරී තත්ත්වය සමනය කිරීමට ඉවහල් වනු ඇතැයි බොහෝ දෙනා බලාපොරොත්තු වෙති.
