මෙරට සෞඛ්ය සේවාවේ උන්නතිය වෙනුවෙන් සංවර්ධන නිලධාරීන් ඉටුකරන සුවිශේෂී දායකත්වය සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ විශේෂ ඇගයීමට ලක්ව තිබේ. අමාත්යවරයා සහ සංවර්ධන නිලධාරී සේවා සංගමයේ නියෝජිතයන් අතර සෞඛ්ය අමාත්යාංශයේදී පැවති විශේෂ සාකච්ඡාවකදී මේ බව අවධාරණය කෙරිණි. සංවර්ධන නිලධාරීන් මුහුණ දෙන වෘත්තීය ගැටලු හඳුනාගෙන ඒවාට කඩිනම් විසඳුම් ලබාදීම මෙම හමුවේ ප්රධාන අරමුණ විය.
මෙහිදී සංගමය විසින් ඉදිරිපත් කරන ලද ප්රධාන ඉල්ලීම් කිහිපයක් කෙරෙහි අමාත්යවරයාගේ අවධානය යොමු විය. සංවර්ධන නිලධාරීන්ගේ උසස්වීම් සහ පුරප්පාඩු කඩිනමින් යාවත්කාලීන කිරීම, සෞඛ්ය සේවාවේ පවතින MN 05 වැටුප් තලයට අදාළ පුරප්පාඩු සඳහා සුදුසුකම් ලත් උපාධිධාරීන් බඳවා ගැනීමේ හැකියාව සොයා බැලීම, වෘත්තියට අදාළ විධිමත් රාජකාරී ලැයිස්තුවක් සකස් කර ලබාදීම සහ අභ්යන්තර ස්ථාන මාරු ක්රමවේදය වඩාත් විධිමත් ලෙස යාවත්කාලීන කිරීම ඒ අතර ප්රධාන වේ.
මෙහිදී අදහස් දැක්වූ අමාත්යවරයා, මෙම නිලධාරීන්ගේ සේවය වඩාත් කාර්යක්ෂමව මහජනතාව වෙත ලබාදීමට ඇති බාධා ඉවත් කිරීමට අවශ්ය උපදෙස් අමාත්යාංශ නිලධාරීන්ට ලබා දුන්නේය. මෙම සාකච්ඡාව සඳහා සෞඛ්ය අමාත්යාංශයේ අතිරේක ලේකම් ඇතුළු උසස් නිලධාරීන් පිරිසක් මෙන්ම සංවර්ධන නිලධාරී සේවා සංගමයේ සභාපති ජයන්ත ඒකනායක මහතා ඇතුළු නියෝජිත පිරිසක් සහභාගී වූහ.
