මෙක්සිකෝවේ චිහුවාහුවා (Chihuahua) ප්රාන්තයේදී පසුගිය සති අන්තයේ සිදු වූ රිය අනතුරකින් මියගිය ඇමෙරිකානු නියෝජිතයන් දෙදෙනාට එරට තුළ මෙහෙයුම් සිදු කිරීමට නිල අවසරයක් ලබා දී නොතිබූ බව මෙක්සිකෝ රජය නිල වශයෙන් ප්රකාශ කර තිබේ. ඇමෙරිකානු මධ්යම බුද්ධි අංශයට (CIA) සම්බන්ධ බවට සැක කෙරෙන මෙම නියෝජිතයන් දෙදෙනා, අනවසර මත්ද්රව්ය රසායනාගාර වැටලීමකට සහභාගී වී ආපසු එමින් සිටියදී ඔවුන් ගමන් කළ රථය කඳුකර මාර්ගයකින් පෙරළී පුපුරා යාමෙන් ජීවිතක්ෂයට පත් විය.
මෙක්සිකෝ ජනාධිපතිනී ක්ලෝඩියා ෂෙයින්බෝම් (Claudia Sheinbaum) විසින් නියම කරන ලද පරීක්ෂණයකින් අනතුරුව එරට ආරක්ෂක අමාත්යාංශය සඳහන් කළේ, මෙම නියෝජිතයන්ට මෙහෙයුම් කටයුතු සඳහා කිසිදු නිල ප්රතීතනයක් (Accreditation) නොතිබූ බවත් ඔවුන්ගේ පැමිණීම පිළිබඳව ෆෙඩරල් බලධාරීන් දැනුවත් කර නොතිබූ බවත්ය. එක් නියෝජිතයෙකු “සංචාරකයෙකු” ලෙසත් අනෙක් පුද්ගලයා රාජ්ය තාන්ත්රික ගමන් බලපත්රයකිනුත් මෙක්සිකෝවට ඇතුළු වී ඇති බව වාර්තා වේ.
මත්ද්රව්ය ජාවාරමට එරෙහිව දැඩි පියවර ගන්නා ලෙස ඇමෙරිකානු ජනාධිපති ඩොනල්ඩ් ට්රම්ප් විසින් මෙක්සිකෝවට දිගින් දිගටම පීඩනය එල්ල කරමින් සිටින පසුබිමක මෙම සිදුවීම වාර්තා වී තිබේ. කෙසේ වෙතත්, තම රටේ ස්වෛරීභාවය ආරක්ෂා කරමින් ඕනෑම විදේශීය නියෝජිතයෙකු මෙක්සිකෝ පසෙහි ක්රියාත්මක විය යුත්තේ ෆෙඩරල් රජයේ පූර්ව අනුමැතිය ඇතිව පමණක් බව ජනාධිපතිනී ෂෙයින්බෝම් දැඩිව අවධාරණය කරයි. මෙම සිදුවීම හේතුවෙන් මත්ද්රව්ය මර්දන කටයුතුවලදී ඇමෙරිකාව සහ මෙක්සිකෝව අතර පවතින රාජ්ය තාන්ත්රික සබඳතා යම් උණුසුම් මුහුණුවරක් ගෙන ඇති බව විචාරකයෝ පවසති.
