මේජර් ජනරාල් සුරේෂ් සලේ මහතා වෙනුවෙන් නීතිඥවරයෙකු ලෙස පෙනී සිටීම කොටුව මහෙස්ත්රාත්වරයා විසින් තහනම් කළ බවට පළ වන මාධ්ය වාර්තා අසත්ය බව පිවිතුරු හෙළ උරුමයේ නායක, නීතිඥ උදය ගම්මන්පිල මහතා අද (27) පැවති මාධ්ය හමුවකදී ප්රකාශ කළේය.
ආණ්ඩුක්රම ව්යවස්ථාවේ 13(3) වගන්තිය සහ අපරාධ නඩු විධාන සංග්රහයේ 260 වගන්තිය අනුව තමන් කැමති නීතිඥවරයෙකුගේ උපදෙස් ලබා ගැනීම සැකකරුවෙකුගේ මූලික අයිතිවාසිකමක් බව ගම්මන්පිල මහතා පෙන්වා දුන්නේය. එමෙන්ම අධිකරණ සංවිධාන පනතේ 41 වගන්තිය අනුව සැකකරුවෙකු වෙනුවෙන් පෙනී සිටීම නීතිඥවරයාගේ අයිතියක් බව ද ඔහු සඳහන් කළේය.
නීතිඥවරයෙකුට වෘත්තියේ යෙදීම තහනම් කිරීමේ හෝ විනය ක්රියාමාර්ග ගැනීමේ බලය පවතින්නේ ශ්රේෂ්ඨාධිකරණයට පමණක් බවත්, මහෙස්ත්රාත්වරයෙකුට එවැනි බලයක් නොමැති බවත් ඔහු අවධාරණය කළේය. මාධ්ය වාර්තා කළ පරිදි තහනමක් පැනවූයේ නම් එය ස්වභාවික යුක්ති මූලධර්මයට ද පටහැනි බව ඔහු පැවසීය.
තමන් සුරේෂ් සලේ මුණගැසී මාධ්යයට අදහස් දැක්වීම සහ පාස්කු ප්රහාරය ගැන පොතක් ලිවීම සම්බන්ධයෙන් අතිරේක සොලිසිටර් ජනරාල්වරයා ඉදිරිපත් කළ කරුණු ද ඔහු විවේචනය කළේය. සේවාලාභියාගේ රහස්යභාවය රැකීම නීතිඥයාගේ වගකීමක් වුවද, සේවාලාභියාගේ එකඟතාවය මත කරුණු හෙළිදරව් කිරීමේ වරදක් නොමැති බව ඔහු පැවසීය.
පාස්කු ප්රහාරය ගැන පොතක් ලිවීම භාෂණයේ නිදහසට අයත් බවත්, නඩුවක් විනිශ්චයට භාජනය වන (Sub Judice) කාලසීමාව තුළ පමණක් අදහස් ප්රකාශ කිරීමේ සීමාවන් පවතින බවත් ගම්මන්පිල මහතා මෙහිදී වැඩිදුරටත් සඳහන් කළේය.
එදින අධිකරණයේ සිදු වූ නියම තත්ත්වය දැන ගැනීම සඳහා නඩු පොතේ සහතික කළ පිටපතක් ලබා ගැනීමට තමන් කටයුතු කරන බව ද ඔහු ප්රකාශ කළේය.
