මින් ඉදිරියට කිසිදු අවදානමක් නොගෙන, නියමිත වේගසීමා අකුරටම පිළිපදිමින් දුම්රිය ධාවනය කිරීමට තීරණය කළ බව ලොකොමෝටිව් ඔපරේටිව් ඉංජිනේරුවන්ගේ සංගමය පවසයි. මේ හේතුවෙන් දිවයින පුරා දුම්රිය ධාවනයේ යම් ප්රමාදයක් ඇති විය හැකි බව එම සංගමයේ සභාපති ජීව ගුණවර්ධන මහතා අවධාරණය කළේය.
පසුගියදා වාද්දුවේදී පීලිපැනීමට ලක්වූ සාගරිකා දුම්රියේ රියදුරු ඇතුළු කාර්ය මණ්ඩලයේ සේවය තාවකාලිකව නතර කිරීමට පාලනාධිකාරිය ගත් තීරණයට විරෝධය පළ කරමින් මෙම පියවර ගෙන ඇත. අදාළ අනතුර රියදුරුගේ වරදින් සිදු වූවක් නොවන බවත්, විමර්ශන අවසන් වීමට පෙර මෙලෙස දඬුවම් කිරීම අසාධාරණ බවත් වෘත්තිය සංගමය පෙන්වා දෙයි.
මෙතෙක් කලක් දුම්රිය නියමිත වේලාවට ධාවනය කළේ රියදුරන් සිය රැකියාවේ අවදානමක් ගනිමින් බව ජීව ගුණවර්ධන මහතා පැවසීය. දුම්රිය මඟීන්ගේ ප්රමාදය වළක්වා ගැනීමට එලෙස කටයුතු කළ ද, පාලනාධිකාරිය රියදුරන් පමණක් ඉලක්ක කර දඬුවම් කරන බැවින් මින් ඉදිරියට එවැනි අවදානමක් නොගැනීමට ඔවුන් තීරණය කර ඇත.
ධාවනය වන දුම්රියවලින් 80%ක පමණ වේගය මැන ගැනීමට අවශ්ය මීටර් ඇතුළු උපාංග නොමැති බව සංගමය අනාවරණය කරයි. දුම්රිය මාර්ග නිසි ලෙස නඩත්තු නොකිරීම ද අනතුරුවලට හේතුවක් බව ඔවුන් පවසයි.
අඩුපාඩු සහිත දුම්රිය අලුත්වැඩියා කර දීම සඳහා පාලනාධිකාරියට යම් කාලයක් ලබා දෙන බවත්, එම කාලය තුළ විසඳුම් නොලැබෙන්නේ නම් තාක්ෂණික දෝෂ සහිත දුම්රිය ධාවනයෙන් සහමුලින්ම ඉවත් වන බවත් වෘත්තිය සංගමය වැඩිදුරටත් අවධාරණය කළේය.
