ඉරාන විදේශ අමාත්ය අබ්බාස් අරග්චි (Abbas Araghchi) මහතා ඕමානයේ නිලධාරීන් සමඟ පැවැත්වූ සාකච්ඡාවලින් අනතුරුව හෝමුස් සමුද්ර සන්ධිය (Strait of Hormuz) සම්බන්ධයෙන් දෙරට අතර ඇතැම් එකඟතාවලට පැමිණි බව අද (27) ප්රකාශ කළේය.
ඉරානය සහ ඕමානය යන රටවල් දෙකම හෝමුස් සමුද්ර සන්ධියට මායිම්ව පිහිටි වෙරළබඩ රටවල් බැවින්, පොදු අවශ්යතා ආරක්ෂා කර ගැනීම සඳහා සමීප සම්බන්ධීකරණයකින් කටයුතු කිරීම අත්යවශ්ය බව අරග්චි මහතා අවධාරණය කළේය. මේ සම්බන්ධයෙන් දෙරටේ විශේෂඥ මට්ටමේ උපදේශන තවදුරටත් ඉදිරියට ගෙන යන බව ද ඔහු සඳහන් කළේය.
ඕමාන විදේශ අමාත්ය බද්ර් අල්බුසයිඩි (Badr Albusaidi) මහතා ප්රකාශ කළේ හෝමුස් සමුද්ර සන්ධියේ නාවික ගමනාගමන නිදහස තහවුරු කිරීම සඳහා “වැඩිදුර රාජ්ය තාන්ත්රික ක්රියාමාර්ග” සහ “ප්රායෝගික විසඳුම්” අවශ්ය බවයි. කෙසේ වෙතත්, නිල වශයෙන් ගිවිසුම් අත්සන් කිරීමක් පිළිබඳව ඔහු සඳහන් කර නොමැති වීම විශේෂත්වයකි.
ඉරානය සහ වොෂින්ටනය අතර සාකච්ඡා බේරා ගැනීම සඳහා ඉස්ලාමාබාද් නුවර බලධාරීන් සමඟ පැවැත්වූ සාකච්ඡා ද ඉතා සාර්ථක වූ බව ඉරාන විදේශ අමාත්යවරයා වැඩිදුරටත් පවසා සිටියේය.
හෝමුස් සමුද්ර සන්ධිය යනු ගෝලීය තෙල් වෙළඳාමෙන් සැලකිය යුතු ප්රමාණයක් සිදුවන ලොව වැදගත්ම නාවික මාර්ගයක් වන බැවින් මෙම සාකච්ඡා ජාත්යන්තර අවධානයට ලක්ව තිබේ.
