කෘතිම බුද්ධි මෘදුකාංග නිෂ්පාදනය කරන ප්රමුඛ පෙළේ සමාගමක් වන ඩයිනට්රේස් හි ප්රධාන කොටස් හිමිකාරීත්වයක් අත්පත් කර ගැනීමට ක්රියාකාරී ආයෝජන සමාගමක් වන ස්ටාර්බෝඩ් වැලියු පියවර ගෙන තිබේ. මෙම පුවත ප්රකාශයට පත්වීමත් සමඟ ඩයිනට්රේස් සමාගමේ කොටස් අගය 8%කින් පමණ ඉහළ ගොස් ඇති අතර වෝල් ස්ට්රීට් ජර්නල් වාර්තා කරන පරිදි ස්ටාර්බෝඩ් වැලියු ආයතනය මේ වන විට එම සමාගමේ ප්රධාන කොටස්කරුවන් පස්දෙනා අතරට ද පැමිණ ඇත. ඩයිනට්රේස් සමාගමේ කොටස් වෙළඳපොළ වටිනාකම එහි සැබෑ අගයට වඩා අඩුවෙන් පවතින බව පෙන්වා දෙන ස්ටාර්බෝඩ් ආයතනය සමාගමේ කොටස් මිල ඉහළ නැංවීම සඳහා උපායමාර්ගික වෙනස්කම් කිහිපයක් සිදු කරන ලෙස කළමනාකාරීත්වයට යෝජනා කර තිබේ.
ස්ටාර්බෝඩ් ආයතනය ඉදිරිපත් කර ඇති ප්රධාන යෝජනා අතර ඉදිරි වසර තුන ඇතුළත ඩොලර් බිලියන 2.5කට අධික වටිනාකමකින් යුත් කොටස් නැවත මිලදී ගැනීමේ වැඩසටහනක් වේගවත් කිරීම ප්රධාන වේ. එසේම මෑත කාලීනව සමාගමේ ආදායම් වර්ධනය මන්දගාමී වීම පිළිබඳව ආයෝජකයින් තුළ පවතින අවිශ්වාසය දුරු කිරීමට පියවර ගන්නා ලෙසත් කොටස්කරුවන්ට වැඩි ප්රතිලාභ ලබා දීම සඳහා මෙහෙයුම් පිරිවැය කළමනාකරණය කිරීමේ වෙනස්කම් සිදු කරන ලෙසත් ඔවුන් අවධාරණය කර ඇත. ඩයිනට්රේස් සමාගම සිය 2026 වසරේ ආදායම් පුරෝකථනය ඉහළ නංවා තිබියදීත් මේ වසරේදී ඔවුන්ගේ කොටස් අගය 17%කින් පමණ පහත වැටී තිබූ අතර ස්ටාර්බෝඩ් වැලියු වැනි ක්රියාකාරී ආයෝජකයින් මෙලෙස මැදිහත් වන්නේ සමාගමේ පාලනයට බලපෑම් කරමින් කොටස් මිල ඉහළ නංවා ආයෝජකයින්ට උපරිම වාසි ලබා දීමේ අරමුණිනි.
