පාකිස්ථානය විසින් ඇෆ්ගනිස්ථානයට එල්ල කරන ලද මෝටාර් සහ රොකට් ප්රහාර හේතුවෙන් පුද්ගලයින් සිව්දෙනෙකු මියගොස් තවත් 70 දෙනෙකු තුවාල ලබා ඇති බව තලේබාන් රජය ඊයේ (27) නිවේදනය කළේය. දෙරට අතර පවතින බිඳෙනසුලු සාම සාකච්ඡා අඩපණ කරමින් මෙම ගැටුම් යළි ඇවිළී තිබේ. කුනාර් (Kunar) ප්රාන්තයේ අසදබාද්හි පිහිටි නිවාස සහ සයිඩ් ජමලුදීන් ඇෆ්ගානි විශ්වවිද්යාලය ඉලක්ක කර මෙම ප්රහාර එල්ල වී ඇති අතර, තුවාල ලැබූවන් අතර සිසුන්, කාන්තාවන් සහ ළමයින් 30 දෙනෙකු පමණ සිටින බව තලේබාන් නියෝජ්ය ප්රකාශක හම්දුල්ලා ෆිට්රාත් ප්රකාශ කළේය. සාමාන්ය ජනතාව සහ අධ්යාපන ආයතන ඉලක්ක කර එල්ල කළ මෙම ප්රහාරය “නොමිනිය හැකි යුද අපරාධයක්” ලෙස හඳුන්වමින් ඔහු සිය දැඩි විරෝධය පළ කර සිටියේය.
කෙසේ වෙතත්, පාකිස්ථාන රජය මෙම චෝදනා ප්රතික්ෂේප කර ඇති අතර ඒවා පදනම් විරහිත ප්රචාර බව පවසයි. පාකිස්ථාන තොරතුරු අමාත්යාංශය අවධාරණය කරන්නේ තමන් ප්රහාර එල්ල කරන්නේ ඇෆ්ගනිස්ථානය තුළ ස්ථාපිත ත්රස්තවාදී මධ්යස්ථානවලට පමණක් බවත්, එවැනි සෑම ප්රහාරයක්ම පැහැදිලි සාක්ෂි මත පදනම්ව සිදුකරන බවත්ය. දෙරට අතර දේශසීමා ගැටුම් මෙලෙස උත්සන්න වීම කලාපීය ආරක්ෂාවට තර්ජනයක් වී ඇති අතර, පාකිස්ථාන හමුදාව මෙම නවතම සිදුවීම සම්බන්ධයෙන් මෙතෙක් නිල ප්රකාශයක් නිකුත් කර නොමැත. මෙම ගැටුම්කාරී තත්ත්වය හේතුවෙන් දේශසීමා ආශ්රිත ප්රදේශවල ජනතාව දැඩි භීතියට පත්ව සිටිති.
