ඔස්ට්රේලියාවේ සිඩ්නි නුවර ‘ලයිට්හවුස් බයි මෙරිටන්’ මහල් නිවාස සංකීර්ණයේ 13 වන මහලෙන් පිටත පටු බැම්මක් මත සිරවී සිටි ‘එල්බී’ නමැති කුඩා සුනඛයා බේරා ගැනීමට ඊයේ අතිශය අවදානම් සහගත මෙහෙයුමක් ක්රියාත්මක විය. දින කිහිපයක් තිස්සේ අතුරුදන්ව සිටි මෙම ටෙරියර් වර්ගයේ සුරතලා මරණයත් ජීවිතයත් අතර සටනක නිරත වෙමින් සිටියදී නිරුපද්රිතව බේරා ගැනීමට ගිනි නිවන භටයෝ සමත් වූහ. පසුගිය සති අන්තයේ අතුරුදන් වූ එල්බීව සොයා ගැනීමට නොහැකිව හිමිකරුවන් දැඩි අසීරුතාවයට පත්ව සිටි අතර පසුව ඩ්රෝන කැමරාකරුවෙකු කළ සෝදිසියකදී මෙම සුනඛයා 13 වන මහලේ ජනේලයකට පිටතින් වූ කුඩා බැම්මක් මත සිටින අයුරු හඳුනා ගන්නා ලදී.
ගිනි නිවන රථයක ඉණිමඟකට එම උසට ළඟා වීමට නොහැකි වූ අතර ඇතුළතින් ජනේලය විවෘත කිරීමේදී බියට පත්වන සුනඛයා පහළට වැටීමේ අවදානමක් තිබූ බැවින් විශේෂඥ ගිනි නිවන භටයෙකු මහල් 17කින් යුත් ගොඩනැගිල්ලේ පියස්සේ සිට කඹයක ආධාරයෙන් පහළට බැස එල්බීව සිය ග්රහණයට ගැනීමට පියවර ගත්තේය. ඊයේ පස්වරු 3:30ට පමණ ක්රියාත්මක වූ මෙම මෙහෙයුමේදී කඹයෙන් එල්ලෙමින් පැමිණි භටයා සුනඛයාව සුරක්ෂිතව අල්ලාගෙන ජනේලය හරහා ඇතුළත සිටි පිරිස වෙත ලබා දුන්නේ පහත රැස්ව සිටි විශාල ජනකායකගේ ප්රීති ඝෝෂා මධ්යයේය. තාක්ෂණයේ සහ මානුෂීය කැපවීමේ සුසංයෝගයෙන් නිම වූ මෙම මෙහෙයුම මේ වන විට ජාත්යන්තර මාධ්යවල ද දැඩි අවධානයට ලක්ව තිබේ.
