තායිලන්තයේ බැංකොක් නුවර පැවැත්වෙන ESCAP (ආසියා පැසිෆික් කලාපය සඳහා වන එක්සත් ජාතීන්ගේ ආර්ථික හා සමාජ කොමිසම) සැසිවාරය අතරතුර ශ්රී ලංකාව සහ බංග්ලාදේශය අතර ද්විපාර්ශ්වික සබඳතා තවදුරටත් පුළුල් කිරීමේ අරමුණින් විශේෂ අමාත්ය මට්ටමේ සාකච්ඡාවක් පවත්වනු ලැබීය. මෙහිදී ශ්රී ලංකාව නියෝජනය කරමින් ග්රාමීය සංවර්ධන, සමාජ ආරක්ෂණ හා ප්රජා සවිබල ගැන්වීම් අමාත්ය මහාචාර්ය උපාලි පන්නිල මහතා සහ බංග්ලාදේශය නියෝජනය කරමින් එරට විද්යා හා තාක්ෂණ අමාත්ය ෆකීර් මහබුබ් අනාම් (Fakir Mahbub Anam) මහතා සහභාගී වූහ.
මෙම හමුවේදී දෙරට අතර පවතින දීර්ඝකාලීන මිත්රත්වය සහ අන්යෝන්ය ගෞරවය මත පදනම් වූ ශක්තිමත් හවුල්කාරීත්වය නැවත තහවුරු කළ අතර කලාපීය සහයෝගීතාව වර්ධනය කිරීමේ වැදගත්කම ද අවධාරණය කෙරිණි. විශේෂයෙන්ම SAARC සහ BIMSTEC වැනි කලාපීය වේදිකාවල පොදු අවශ්යතා වෙනුවෙන් පෙනී සිටිමින් වෙළඳාම, ආයෝජන සහ සංචාරක ක්ෂේත්රයන්හි සහයෝගීතාව තවදුරටත් දියුණු කිරීමට ඇති අවස්ථා පිළිබඳව දෙපාර්ශ්වයම සිය අවධානය යොමු කළහ.
ආර්ථික සම්බන්ධතා වඩාත් විධිමත් කිරීමේ පියවරක් ලෙස යෝජිත ප්රාථමික වෙළඳ ගිවිසුම (Preferential Trade Agreement) සඳහා දැනට ක්රියාත්මක වන උත්සාහයන් පිළිබඳව ද මෙහිදී සාකච්ඡා වී තිබේ. රාජ්ය මට්ටමේ නිරන්තර සංවාදය පවත්වා ගැනීම සඳහා ඒකාබද්ධ ක්රියාකාරී කණ්ඩායම් (Joint Working Groups) සහ ආර්ථික කොමිෂන් වැනි ආයතනික ව්යුහයන් ශක්තිමත් කිරීමේ අවශ්යතාවය අමාත්යවරුන් දෙපළ විසින් මෙහිදී පෙන්වා දෙන ලදී. මෙම නව එකඟතා හරහා කලාපීය වශයෙන් දෙරටේ සමාජ හා ආර්ථික ප්රවණතාවලට හිතකර බලපෑමක් ඇති වනු ඇතැයි අපේක්ෂා කෙරේ.
