පාස්කු ප්රහාරයේ සැකකරුවන් අත්අඩංගුවට නොගත් බවට එල්ල වී ඇති චෝදනා මත පදනම්ව තමන්ට එරෙහිව පියවර ගැනීම වළක්වන ලෙස ඉල්ලා මහජන ආරක්ෂක අමාත්යාංශයේ ලේකම්, හිටපු නියෝජ්ය පොලිස්පති රවි සෙනෙවිරත්න මහතා ගොනුකළ මූලික අයිතිවාසිකම් පෙත්සම් විභාගය ශ්රේෂ්ඨාධිකරණය විසින් අද (28) අවසන් කරන ලදී. අගවිනිසුරු ප්රීතී පද්මන් සූරසේන, අචල වෙන්ගප්පුලි සහ ගිහන් කුලතුංග යන මහත්වරුන්ගෙන් සමන්විත ත්රිපුද්ගල විනිසුරු මඩුල්ල හමුවේ මෙම පෙත්සම සලකා බැලුණු අතර, එහි තීන්දුව ඉදිරි දිනයකදී ප්රකාශයට පත් කිරීමට නියමිතය.
මෙහිදී වගඋත්තරකාර නීතීපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් ජනාධිපති නීතිඥ සුදර්ශන සිල්වා මහතා අධිකරණයට දන්වා සිටියේ අදාළ සිද්ධිය සම්බන්ධයෙන් විමර්ශන අවසන් කර ඇති නමුත්, ඒ හා සම්බන්ධ සැකකරුවන් පිළිබඳ කිසිදු තොරතුරක් මෙතෙක් අනාවරණය වී නොමැති බවයි. මීට පෙර රහස් පොලිසියේ හිටපු අධ්යක්ෂ ශානි අබේසේකර මහතා ද මෙවැනිම පෙත්සමක් ඉදිරිපත් කළ නමුත්, ඔහුට එරෙහිව සාක්ෂි නොමැති බව දැනුම් දීමෙන් පසු ඔහු එම පෙත්සම ඉල්ලා අස්කර ගත්තේය. රාජ්ය ආරක්ෂක අමාත්යාංශයේ ලේකම්වරයා සහ නීතීපතිවරයා ඇතුළු පිරිසක් රවි සෙනෙවිරත්න මහතාගේ මෙම පෙත්සමේ වගඋත්තරකරුවන් ලෙස නම් කර ඇත.
