කොළඹ තදාසන්න ප්රදේශයේ දුම්රිය සේවාව නවීකරණය කිරීම සහ විදුලි දුම්රිය ව්යාපෘතිය ක්රියාත්මක කිරීම පිළිබඳව ජනාධිපති අනුර කුමාර දිසානායක මහතා සහ ප්රවාහන අමාත්යාංශයේ නිලධාරීන් අතර අද (29) පෙරවරුවේ ජනාධිපති කාර්යාලයේදී විශේෂ සාකච්ඡාවක් පැවැත්විණි. එහිදී මෙම ව්යාපෘතිය ලබන වසර මුලදී ආරම්භ කිරීමට තීරණය කර තිබේ.
කොළඹ තදාසන්න දුම්රිය ව්යාපෘතිය යටතේ පළමු අදියර වශයෙන් මාර්ග තුනක් විද්යුත්කරණය කිරීමට සැලසුම් කර ඇත. ඒ අනුව කැලණිවැලි මාර්ගයේ මරදාන සිට මාකුඹුර දක්වා ද, ප්රධාන මාර්ගයේ කොළඹ කොටුව සිට රාගම දක්වා ද, මුහුදුබඩ මාර්ගයේ කොළඹ කොටුව සිට පානදුර දක්වා ද විදුලි දුම්රිය සේවාවන් හඳුන්වා දෙනු ලැබේ.
දැනට පවතින දුම්රිය සේවාවට සමාන්තරව විද්යුත් දුම්රිය ධාවනය කිරීමේ සැලසුම් මෙහිදී සලකා බැලුණි. විශේෂයෙන්ම දැනට පවතින පුළුල් පළල (Broad Gauge) සහිත දුම්රිය මාර්ග වෙනුවට සම්මත පළල (Standard Gauge) යොදා ගනිමින් මාර්ග ප්රතිසංස්කරණය කිරීම පිළිබඳව ද අවධානය යොමු විය.
ව්යාපෘතිය සඳහා අවශ්ය මූල්ය ප්රතිපාදන සපයා ගැනීම සහ එය ක්රියාත්මක කිරීමේදී ඇතිවිය හැකි අභියෝග පිළිබඳව ද නිලධාරීන් ජනාධිපතිවරයා දැනුවත් කරන ලදී. මෙම සාකච්ඡාව සඳහා විෂය භාර අමාත්යවරුන් සහ අමාත්යාංශ ලේකම්වරුන් ඇතුළු ජ්යෙෂ්ඨ නිලධාරීන් පිරිසක් සහභාගී වී සිටියහ.
