2019 පාස්කු ඉරිදා එල්ල වූ මරාගෙන මැරෙන ත්රස්ත ප්රහාරය පිළිබඳව එවකට සිටි ජනාධිපති මෛත්රීපාල සිරිසේන මහතා සහ රාජ්ය බුද්ධි සේවයේ ප්රධානී නිලන්ත ජයවර්ධන මහතා කල්තියා තොරතුරු දැන සිටි බව තමන් විශ්වාස කරන බව හිටපු ආරක්ෂක ලේකම් හේමසිරි ප්රනාන්දු මහතා පවසයි. ප්රහාරය වළක්වා ගැනීමට කටයුතු නොකිරීම සම්බන්ධයෙන් තමන්ට එරෙහිව පවරා ඇති නඩුව විභාගයට ගත් අවස්ථාවේදී විත්ති කූඩුවේ සිට ප්රකාශයක් කරමින් ඔහු මේ බව සඳහන් කළේය.
හේමසිරි ප්රනාන්දු මහතා අධිකරණය හමුවේ කියා සිටියේ, එවකට පැවති දේශපාලන ව්යාකූලත්වය හමුවේ ජනාධිපතිවරයා විසින් අගමැතිවරයාට සහ පොලිස්පතිවරයාට ජාතික ආරක්ෂක කවුන්සිලයට සහභාගී වීම තහනම් කර තිබූ බවයි. එසේම, ප්රහාරයට පෙර අප්රේල් 04 වනදා ලැබුණු බුද්ධි තොරතුරු අප්රේල් 08 වනදා වාර්තාවෙන් නිලන්ත ජයවර්ධන මහතා විසින් ඉවත් කර තිබූ බවත්, එමගින් ඔහු තොරතුරු යටපත් කිරීමට උත්සාහ කළ බව තමන්ට පෙනී ගිය බවත් හිටපු ආරක්ෂක ලේකම්වරයා හෙළි කළේය.
ප්රහාරයට පෙර දින (අප්රේල් 20) රාත්රියේ මරාගෙන මැරෙන ප්රහාර 08ක් පිළිබඳ තොරතුරු වට්ස්ඇප් පණිවුඩයක් හරහා තමන්ට ලැබුණු බවත්, ඒ පිළිබඳව විමසීමේදී වැඩිදුර වාර්තා ලබා දෙන බව නිලන්ත ජයවර්ධන මහතා පැවසුවද ප්රහාරය එල්ල වන තෙක් එවැනි වාර්තාවක් නොලැබුණු බවත් ඔහු පැවසීය. ආරක්ෂක අමාත්යවරයා ලෙස කටයුතු කළ ජනාධිපතිවරයා රටින් බැහැරව සිටි අවස්ථාවේ, ජ්යෙෂ්ඨතම නිලධාරියා වීම නිසා තමන්ට මෙම චෝදනාවලට මුහුණ දීමට සිදු වූ බව හේමසිරි ප්රනාන්දු මහතා මෙහිදී වැඩිදුරටත් අවධාරණය කළේය.
