භාණ්ඩාගාරයේ සහ තැපැල් දෙපාර්තමේන්තුවේ මුදල් අවභාවිත වීම මෙන්ම කොන්ත්රාත්කරුවන්ට දෙවරක් ගෙවීම් සිදු කිරීමේ සිද්ධීන් සම්බන්ධයෙන් වර්තමාන රජය වගකිව යුතු බව ශ්රී ලංකා පොදුජන පෙරමුණේ ජාතික සංවිධායක නාමල් රාජපක්ෂ මහතා ප්රකාශ කළේය. අද දින නෙළුම් මාවතේ පැවති මාධ්ය හමුවකදී ඔහු මේ බව සඳහන් කළේය.
භාණ්ඩාගාරයේ ඩොලර් මිලියන 2.5ක් වැරදි ගිණුමකට බැර වීම සහ තැපැල් දෙපාර්තමේන්තුවෙන් ඩොලර් ලක්ෂ හයක් වෙනත් ගිණුමකට යොමු වීම සම්බන්ධයෙන් මුදල් අමාත්යවරයා ලෙස ජනාධිපතිවරයාත්, එහි ලේකම්වරයාත් වගකිව යුතු බව ඔහු පැවසීය.
මුදල් අමාත්යාංශයේ ලේකම්වරයා යනු රාජ්ය සේවයේ පළපුරුද්දක් නොමැති, දේශපාලන පත්වීමක් ලද අයෙකු බවට ඔහු චෝදනා කළේය.
සාමාන්ය පුරවැසියෙකුගෙන් බැංකු ගනුදෙනුවකදී ප්රශ්න දහසක් අසන රටක, බැංකුවකින් බිලියන 13-14ක මුදලක් පිටතට ගන්නා තෙක් සහ කොන්ත්රාත්කරුවන්ට දෙවරක් ගෙවන තෙක් බලධාරීන් නොදැන සිටීම පුදුම සහගත බව ඔහු සඳහන් කළේය.
වර්තමාන ආණ්ඩුව ඉතිහාසයේ වැඩියෙන්ම කම්කරුවන් අසාධාරණයට ලක් කළ සහ වෘත්තීය සමිති මර්දනය කළ ආණ්ඩුවක් බවට ඔහු චෝදනා කළේය.
මැයි දිනය වෙසක් පෝය දිනට යෙදී ඇති බැවින්, බෞද්ධ රටක් ලෙස ආගමික වතාවත්වලට ප්රමුඛතාවය දිය යුතු බව ඔහුගේ අදහසයි.
මැයි දින සැමරුම් ලෙස හෙට (මැයි 1) උදෑසන ටී. බී. ඉලංගරත්න පිළිරුවට පුෂ්පෝපහාර දැක්වීමටත්, සවස් කාලයේ කැලණි විහාරස්ථානයේ ආගමික වතාවත්වලට සහභාගී වීමටත් මහින්ද රාජපක්ෂ මහතා ඇතුළු පිරිස සූදානම් බව ඔහු පැවසීය.
ජනතා විමුක්ති පෙරමුණේ (JVP) සාමාජිකයන්ගේ ද්විත්ව පුරවැසිභාවය පිළිබඳව ඇති වී තිබෙන සැකය සම්බන්ධයෙන් කරුණු අනාවරණය කළ යුතු බවත්, ද්විත්ව පුරවැසියන් පාර්ලිමේන්තුව නියෝජනය කරන්නේ නම් එය ජනතාවට කරන බොරුවක් බවත් ඔහු වැඩිදුරටත් කියා සිටියේය.
